Իրանը և Վրաստանը ողջունել են Ադրբեջանի և ՀՀ-ի միջև խաղաղության պայմանագրի վերաբերյալ համաձայնագիրը
Իրանը ողջունել է Ադրբեջանի և Հայաստանի միջև խաղաղության պայմանագրի վերաբերյալ համաձայնագիրը. հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային։
Նա նշել է, որ Իրանի ԱԳՆ-ն համաձայնագիրը համարում է անհրաժեշտ և կարևոր քայլ Հարավային Կովկասում կայուն խաղաղության հասնելու համար։
«Հուսով եմ, որ երկխոսության և դիվանագիտության միջոցով տարաձայնությունները լուծելու կողմերի ջանքերը շուտով կհանգեցնեն երկու երկրների միջև խաղաղության համաձայնագրի ստորագրմանը և տարածաշրջանում խաղաղության և կայունության հաստատմանը», – ընդգծել է Բաղային։
Վրաստանի ԱԳՆ-ն ևս ողջունել է Հայաստանի և Ադրբեջանի միջև ձեռք բերված համաձայնությունը խաղաղության պայմանագրի բոլոր տասնյոթ կետերի վերաբերյալ։ «Սա պատմական քայլ է տարածաշրջանում երկարաժամկետ խաղաղության և կայունության հաստատման ուղղությամբ», – նշվել է հայտարարության մեջ։
