iPhone-ների գները կարող են թանկանալ գրեթե 1000 դոլարով

Ամերիկյան Apple տեխնոլոգիական ընկերության iPhone սմարթֆոնների գները կարող են աճել 43%-ով՝ ԱՄՆ նախագահ Դոնալդ Թրամփի վարչակազմի կողմից ներդրված նոր մաքսատուրքերի պատճառով. հայտնում է Reuters գործակալությունը՝ հղում անելով Rosenblatt Securities ներդրումային բանկի վերլուծաբաններին։

Նրանց կանխատեսումների համաձայն՝ iPhone 16-ի ամենաէժան տարբերակի արժեքը, որի մեկնարկային գինը կազմել է 799 դոլար, կարող է աճել մինչեւ 1142 դոլար, իսկ iPhone 16 Pro Max մոդելի գինը 1599 դոլարից կհասնի 2300 դոլարի։

Ինչպես բացատրում են վերլուծաբանները, գների նման աճը պայմանավորված է այն հանգամանքով, որ Apple-ի արտադրության մեծ մասը Ճինաստանում է, և հավելյալ ծախսերի բեռն ընկերությունը կտեղափոխի գնորդների վրա:

Reuters-ը նշում է, որ Թրամփն իր առաջին նախագահության ընթացքում մաքսատուրքեր է սահմանել չինական ապրանքների լայն շրջանակի վրա՝ ստիպելու ամերիկյան ընկերություններին վերադարձնել արտադրությունը կա՛մ Միացյալ Նահանգներ, կա՛մ մոտակա երկրներ:

Ապրիլի 2-ին Թրամփը հայտարարել է շատ երկրներից ներմուծվող ապրանքների մաքսատուրքերի մասին՝ թիրախավորելով Չինաստանին 34 տոկոս դրույքաչափով։ Այլ երկրների համար Վաշինգտոնի ներմուծման անհատական մաքսատուրքերը ուժի մեջ կմտնեն ապրիլի 9-ին։ 10% համընդհանուր տուրքերը ուժի մեջ կմտնեն մի քանի օր շուտ՝ ապրիլի 5-ին։