Ո՞վ կհաջորդի Հռոմի Պապ Ֆրանցիսկոսին․ առաջիկա շաբաթներին կհավաքվի կոնկլավ՝ նոր պոնտիֆիկոս ընտրելու համար

Հռոմի Պապ Ֆրանցիսկոսը մահացել է 88 տարեկանում, ինչը նշանակում է, որ շուտով կոնկլավ կհրավիրվի կաթոլիկ եկեղեցու նոր առաջնորդի ընտրության համար։ Թե ո՞վ կարող է դառնալ հաջորդ Հռոմի Պապը, կանխատեսել է Politico պարբերականը։

Ինչպես նշվել է, ակնկալվում է, որ քվեարկությունը կսկսվի Պապի հուղարկավորությունից երկու-երեք շաբաթ անց, երբ Վատիկանի Սիքստինյան կապելլայում կհավաքվեն կարդինալները՝ սկսելու նոր Պապի ընտրության խիստ գաղտնի գործընթացը: Տեսականորեն, ցանկացած մկրտված տղամարդ՝ հռոմեական կաթոլիկ, կարող է դառնալ Պապ, սակայն վերջին 700 տարիների ընթացքում Պապը միշտ ընտրվել է կարդինալներից:

Հաղթող ընտրելը հեշտ չէ։ 2013-ի վերջին կոնկլավի ժամանակ կարդինալ Խորխե Բերգոլիոն հեռու էր Հռոմի Պապ Բենեդիկտոս XVI-ին հաջորդելու ֆավորիտ լիելուց: Այնուամենայնիվ, նա դարձավ Հռոմի պապ 24 ժամ և քվեարկության հինգ փուլից հետո:

Վատիկանի դիտորդներն արդեն սկսել են շահարկել պոտենցիալ իրավահաջորդների անունները դեռ այն ժամանակ, երն պոնտիֆիկոսի առողջական վիճակը վատացել էր:

Հաջորդ պոնտիֆիկոսը կժառանգի խորապես պառակտված եկեղեցի, որը պայքարում է գաղափարական լարվածության հետ այնպիսի հարցերի շուրջ, ինչպիսիք են ԼԳԲՏՔ+ ընդգրկումը և կղերական չարաշահումները, միաժամանակ նավարկում արագ փոփոխվող աշխարհաքաղաքական լանդշաֆտում, որը պատված է տարածքային և մշակութային հակամարտություններով։

Ինչպես նշվել է, 266 պապերից 217-ը եկել են Իտալիայից, բայց վերջին երեքը Վատիկանի ծագում չեն ունեցել։

Իտալացի կարդինալ 70-ամյա Պիետրո Պարոլինը, ով Վատիկանի պետքարտուղարն է և Ֆրանցիսկոսի տեղակալը 2013 թվականից, կարող է դիտվել որպես Ֆրանցիսկոսի բնական ժառանգորդը։ Նրան հանձնարարված է եղել իրականացնել Պապի բարեփոխումները, և նա եղել է դիվանագիտության շարժիչ ուժը:

Նա վճռորոշ դեր է խաղացել Սուրբ Աթոռի և Չինաստանի միջև հարաբերությունների վերականգնման և Պեկինի հետ համատեղ չինացի եպիսկոպոսներ նշանակելու համաձայնագրի ստորագրման գործում: Նա դիտվում է որպես առաջադեմ։ Մեծ դեր է ստանձնել Պապի հիվանդության ժամանակ՝ ղեկավարելով նրա ապաքինման համար աղոթքի նիստը, որը որոշների կողմից դիտվում էր որպես նախընտրական անվայել հայտ:

Այնուամենայնիվ, Պարոլինը համարվում է չափազանց բյուրոկրատական և չունի հանգուցյալ Պապի խարիզման:

Մեկ այլ թեկնածու է կարդինալ Պիերբատիստա Պիցցաբալան, ով Երուսաղեմի Լատինական պատրիարքն է: Պիցցաբալան, ով ավելի քան երեք տասնամյակ ապրել է Սուրբ երկրում, խոսում է եբրայերեն և խոստովանել է, որ «անհրաժեշտության» դեպքում խոսում է Համասի հետ, Մերձավոր Արևելքում հեղինակություն է, ինչը կարող է առավելություն լինել:

Այդուհանդերձ, նա փոքր-ինչ երիտասարդ է Հռոմի պապ լինելու համար, քանի որ կարդինալները չեն ցանկանում ընտրել այնպիսի առաջնորդի, որը, հավանաբար, կմնա մի քանի տասնամյակ:
Եթե կարդինալները կրկին ընտրեն ոչ եվրոպացի, ֆիլիպինցի կարդինալ Լուիս Թագլը կարող է առաջատար լինել: Մանիլայի 67-ամյա նախկին արքեպիսկոպոսը կիսում է Ֆրանցիսկոսի ուշադրությունը սոցիալական արդարության և աղքատության դեմ պայքարի վրա: Նա խստորեն քննադատում էր նախկին նախագահ Ռոդրիգո Դուտերտեի օրոք իր երկրում տեղի ունեցած արտադատական սպանությունները, որոնց ընթացքում մի քանի հազար մարդ է մահացել։
Եկեղեցին կարող է նաև պատմություն կերտել, եթե ընտրի իր առաջին աֆրիկացի պապին ժամանակակից դարաշրջանում: Գանայի կարդինալ Փիթեր Թուրքսոնի թեկնածությունն, որը ժամանակին ֆավորիտ էր համարվում 2013 թվականի կոնկլավի ժամանակ, կրկին քննարկվում է:

2013-ին տված հարցազրույցում նա հայտարարել է, որ երեխաների սեռական բռնությունն ավելի քիչ տարածված է Աֆրիկայում՝ ավանդական մշակութային պաշտպանության պատճառով: Մեկ տարի առաջ նա ներողություն է խնդրել Եպիսկոպոսների Սինոդի ժամանակ Եվրոպայում իսլամի տարածման մասին նախազգուշացնող տեսաերիզ ցուցադրելու համար:

Ֆրանցիսկոսը զգալիորեն փոխեց Կարդինալների քոլեջի աշխարհագրական հավասարակշռությունը՝ ավելի շատ կարդինալներ նշանակելով ավելի աղքատ շրջաններից, որոնք պատմականորեն քիչ ներկայացված էին Եկեղեցու ամենաբարձր օղակներում, ինչը կարող է կարևոր դեր ունենալ հաջորդ Պապի ընտրության գործընթացում: