Մակրոնն ԱՄՆ դատարան կներկայացնի «գիտական ապացույցներ», որ Ֆրանսիայի առաջին տիկինը տղամարդ չէ
Ֆրանսիայի նախագահ Էմանուել Մակրոնը և նրա կինը՝ Բրիջիտը, պատրաստվում են ԱՄՆ դատարան ներկայացնել Ֆրանսիայի առաջին տիկնոջ կին լինելու վերաբերյալ լուսանկարչական և գիտական ապացույցներ․ գրում է BBC-ն։
Փաստաբանը նշում է, որ Ֆրանսիայի նախագահը և տիկին Մակրոնը կներկայացնեն փաստաթղթերը զրպարտության մասին հայցի շրջանակում։ Մակրոն ընտանիքը հայցը ներկայացրել է Քենդիս Օուենսի դեմ, երբ Օուենսը հայտարարել էր, որ Բրիջիտ Մակրոնը տղամարդ է։
Մակրոնների փաստաբան Թոմ Քլերը նշել է, որ տիկին Մակրոնը մեղադրանքները համարել է «չափազանց վշտացնող»։
Քլերը նշել է, որ կլինեն «գիտական բնույթի փորձագիտական վկայություններ»՝ հավելելով, որ զույգը պատրաստ է ապացուցել, որ մեղադրանքները կեղծ են:
«Դա գործընթաց է, որին նա (Բրիջիտ Մակրոնը – խմբ․) պետք է ենթարկվի հրապարակային ձևով։ Բայց նա պատրաստ է դա անել։ Նա վճռականորեն որոշել է անել անհրաժեշտ ամեն բան իրավիճակը շտկելու համար», – ասել է Քլերը։
Հարցին՝ արդյոք Մակրոնները կտրամադրեն Բրիջիտի հղի ժամանակ արված լուսանկարները, փաստաբանը պատասխանել է, որ դրանք գոյություն ունեն և կներկայացվեն դատարանում։
Քենդիս Օուենսը, որը նախկինում աշխատել է որպես մեկնաբան միլիոնավոր հետևորդներ ունեցող ամերիկյան պահպանողական Daily Wire լրատվամիջոցում, բազմիցս առաջ է քաշել այն տեսակետը, որ Բրիջիտ Մակրոնը տղամարդ է։
2024 թվականի մարտին նա հայտարարել է, որ իր «ամբողջ մասնագիտական հեղինակությունը» կդնի այդ մեղադրանքի տակ։
