Ֆինլանդիայում խցանումները թեթևացնելու համար անօդաչու սարքեր և արհեստական բանականություն է օգտագործվում
Ֆինլանդիայի մայրաքաղաք Հելսինկին քաղաքում սահուն երթևեկության ապահովման համար օգտագործում է անօդաչու սարքեր և արհեստական բանականություն. գրում է Euronews-ը։
Հելսինկիի Արևմտյան նավահանգիստը Եվրոպայի երկրորդ ամենածանրաբեռնված նավահանգիստն է, որը տարեկան սպասարկում է մոտ 6 միլիոն լաստանավային ուղևորի։
2023 թվականից ի վեր անօդաչու սարքերը թռչում են խոշոր տրանսպորտային հանգույցի վրայով՝ կապելով լաստանավերը, տրամվայները, մետրոյի գծերը և գնացքները։
Հելսինկիի նորարարական «Forum Virium Helsinki» ընկերության տվյալներով՝ անօդաչու սարքերը տեղեկատվություն են հավաքում ուղևորների ընտրած երթուղիների վերաբերյալ՝ տարբեր տրանսպորտային միջոցների միջև կապը բարելավելու և խցանումները նվազեցնելու համար։
«Նախագիծը նպատակ ունի բարելավել երթևեկության հոսքն արհեստական բանականության լուծումների միջոցով և ստեղծել հիմք ավելի կայուն քաղաքային շարժունակության համար», – Euronews Next-ին ասել է Forum Virium Helsinki ընկերության ղեկավար Էերո Ջալոն։
Անօդաչու սարքերը հետևում են մեքենաներին, տրամվայներին, հեծանիվներին, էլեկտրական սկուտերներին և հետիոտներին: Ըստ համակարգի՝ երեքից վեց անօդաչու սարք նկարահանում է երթևեկությունն ամենածանրաբեռնված ժամերին։ Այնուհետև, խցանումների և երթևեկության հոսքի վերաբերյալ անօդաչու սարքերից ստացված տվյալները փոխանցվում են արհեստական բանականությանը՝ սիմուլյացիաներ ստեղծելու համար։
