«Գազպրոմ»-ն ամենաշատ պարտքեր ունեցող ռուսական ընկերությունն է․ Forbes

Forbes-ի ռուսական բյուրոն հրապարակել է ամենաշատ պարտքեր ունեցող ռուսական ընկերությունների ցանկը:

Աղբյուրի հաշվարկներով՝ վարկանիշում ընդգրկված ընկերությունների ընդհանուր զուտ ֆինանսական պարտքը գերազանցում է 20.5 տրիլիոն ռուբլին: Ըստ Forbes-ի՝ վարկանիշում ընդգրկված բոլոր ընկերությունները «տուժել են Կենտրոնական բանկի բարձր տոկոսադրույքից», ընդ որում՝ որոշ ընկերությունների վարկերի և փոխառությունների տոկոսավճարները կրկնապատկվել կամ ավելի են բարձրացել 2004 թվականից ի վեր։

Առաջին տեղում «Գազպրոմն» է՝  2024 թվականի վերջին 6.047 տրիլիոն ռուբլի զուտ պարտքով (2025 թվականի կեսի դրությամբ՝ 5.79 տրիլիոն ռուբլի): Ընկերությունը վարկերի տոկոսավճարների համար ծախսել է 715.4 միլիարդ ռուբլի, ինչը 83%-ով ավելի է նախորդ տարվա համեմատ։

Ամենաշատ պարտքեր ունեցող ռուսական ընկերությունների վարկանիշում «Ռոսնեֆտը» երկրորդ տեղում է: Forbes-ի հաշվարկներով՝ նրա զուտ պարտքը 2024 թվականի վերջին կազմել է 3.6 տրիլիոն ռուբլի: «Ռոսնեֆտի» վարկային մնացորդներն անհայտ են. ընկերությունը 2022 թվականից ի վեր չի հրապարակել ամբողջական ֆինանսական հաշվետվություններ: 2025 թվականի կեսի դրությամբ՝ պարտքի բեռի վերաբերյալ տվյալները նույնպես հասանելի չեն։

«Ռուսական երկաթուղիներ» ընկերությունը զբաղեցնում է երրորդ տեղը՝ 2024 թվականի վերջին 2.771 տրիլիոն ռուբլի զուտ պարտքով (2025 թվականի կեսին՝ 3.36 տրիլիոն ռուբլի): Ընկերության վարկերի մարումները տարվա ընթացքում աճել են 2.5 անգամ՝ հասնելով 323.5 միլիարդ ռուբլու։

Վարկանիշում ընդգրկված այլ ընկերությունների թվում են «Ատոմէներգոպրոմ»-ը, «Էն+գրուպ»-ը, «Նորիլսկ Նիկել»-ը, «ՍԻԲՈՒՐ»-ը և պետական «Ավտոդոր» ընկերությունը։

Ռուսաստանի կենտրոնական բանկը 2024 թվականի հոկտեմբերից մինչև 2025 թվականի հունիսը պահպանել է հիմնական տոկոսադրույքը ռեկորդային բարձր՝ 21% մակարդակի վրա: Այնուհետև տոկոսադրույքը երեք անգամ իջեցվել է, վերջին անգամ՝ 2025 թվականի սեպտեմբերին՝ մինչև 17%:

Reuters-ը հոկտեմբերի 9-ին հայտնել էր, որ Ռուսաստանի խոշորագույն ընկերություններից շատերն աշխատակիցներին տեղափոխում են կրճատված աշխատանքային գրաֆիկի, ուղարկում են չվճարվող արձակուրդ կամ ազատում են աշխատանքից՝ դժվարին տնտեսական պայմաններում անձնակազմի ծախսերը կրճատելու համար: