Հայերն աշխարհի ամենազայրացած ժողովուրդներից են․ զեկույց
Վերջերս հրապարակված հուզական վիճակի վերաբերյալ համաշխարհային հարցման համաձայն՝ հայերն աշխարհի ամենաբարկացած ժողովուրդներից են, մինչդեռ ուզբեկներն՝ ամենահանգիստներից։
Gallup-ի «Աշխարհի հուզական առողջությունը 2025» զեկույցում փորձ է արվել չափել բացասական հույզերի ու փորձառությունների մի շարք, այդ թվում՝ անհանգստություն, տխրություն, զայրույթ և ֆիզիկական ցավ։ Արդյունքների համաձայն՝ հայերի 43 տոկոսը հայտնել է, որ օրական առնվազն մեկ անգամ զայրույթ է զգում, ինչը գրանցված երրորդ ամենաբարձր տոկոսն է՝ զիջելով միայն Չադին և Հորդանանին։
Ըստ հրապարակման՝ նշված երկրներում զայրույթի բարձր ցուցանիշը պայմանավորված է ակտիվ հակամարտություններով, վերջին շրջանում տեղի ունեցած պատերազմներով և շարունակական քաղաքական և տնտեսական անկայունությամբ։
Gallup-ի տվյալները ցույց են տվել լայն ժողովրդագրական և սեռային անհամապատասխանություններ բացասական հույզեր ունեցողների շրջանում։ Հարցման համաձայն՝ «Աշխարհում կանայք ավելի շատ տխրություն և ֆիզիկական ցավ են զգում»։
«Երիտասարդներն ավելի շատ զայրույթ են զգում, մինչդեռ միջին տարիքի մարդիկ՝ ամենաշատ սթրեսը։ Տարեցներն ամենաշատ տխրությունն են ապրում», – նշվել է զեկույցում։
Հարցումը նաև ձգտում է գրանցել դրական հույզերն ու փորձառությունները, ինչպիսին են ուրախությունը, ծիծաղը և հարգանքով վերաբերվելը։ Ուզբեկստանը 8-րդ տեղում է ամեն օր հաճույք ստացող համաշխարհային բնակչության առումով, որտեղ հարցվածների 88 տոկոսը հայտնել է, որ նախորդ 24 ժամվա ընթացքում ծիծաղել կամ ժպտացել է։
Դանիան, Պարագվայը, Ինդոնեզիան, Մեքսիկան և Գվատեմալան աշխարհի «հաճույքի» վարկանիշային աղյուսակում առաջին հնգյակում են։
Կովկասի կամ Կենտրոնական Ասիայի ոչ մի այլ երկիր չի ընդգրկվել Gallup-ի դրական կամ բացասական հույզերի վարկանիշային աղյուսակի առաջին տասնյակում։
Հարցումը պարզել է, որ անորոշությունն ու հակամարտությունն ավելի ուժեղ ազդեցություն ունեն բացասական հույզերի վրա, քան խաղաղության և անվտանգության զգացումը՝ հաճույքի վրա։
«Հոգեբանները վաղուց են նկատել բացասական կողմնակալությունը. վատ իրադարձություններն ու զգացմունքներն ավելի շատ են ծանրանում մարդկանց մտքում, քան՝ լավերը», – նշվում է հարցման մեջ։
