Եվրամիությանը նոր միացող անդամները կարող են զրկված լինել վետոյի իրավունքից
Նոր երկրները կարող են միանալ Եվրամիությանն՝ առանց վետոյի իրավունքի, ինչը կարող է այնպիսի առաջնորդներին, ինչպիսին է Հունգարիայի վարչապետ Վիկտոր Օրբանը, ավելի հանդուրժող դարձնել Ուկրաինայի նման երկրների անդամակցությանը դաշինքին. գրում է POLITICO-ն:
Ըստ քննարկումներին տեղյակ երեք եվրոպացի դիվանագետների և ԵՄ պաշտոնյայի՝ ԵՄ անդամակցության կանոնները փոխելու առաջարկը գտնվում է վաղ փուլում և պետք է հաստատվի բոլոր գործող երկրների կողմից։ Գաղափարն այն է, որ նոր անդամները կստանան լիարժեք իրավունքներ, երբ ԵՄ-ն վերանայի իր գործունեության ձևը՝ առանձին երկրների համար դժվարացնելով քաղաքականության վրա վետո դնելը։
Սա ԵՄ-ի ընդլայնման կողմնակից կառավարությունների վերջին փորձն է՝ կենդանություն հաղորդելու ընդլայնման գործընթացին, որն այժմ արգելափակվում է Բուդապեշտի և մի քանի այլ մայրաքաղաքների կողմից՝ մտավախությամբ, որ այն կարող է անցանկալի մրցակցություն առաջացնել տեղական շուկաների համար կամ վտանգել անվտանգության շահերը։ Եվրոպական հանձնաժողովը, սկանդինավյան և բալթյան երկրները, ինչպես նաև Կենտրոնական Եվրոպայի երկրներն ավանդաբար կողմ են եղել ընդլայնմանը։
Նախաձեռնությունը թույլ կտա անդամակցության ճանապարհին գտնվող երկրներին՝ Ուկրաինա, Մոլդովա և Չեռնոգորիա, վայելել ԵՄ անդամակցության բազմաթիվ առավելություններ, բայց առանց վետոյի իրավունքի, ինչը ԵՄ կառավարությունները միշտ գնահատել են որպես ԵՄ քաղաքականությունը կանխելու վերջնական գործիք:
