Ադրբեջանում ՀԿ-ներն ակտիվացնում են «Վերադարձ Արևմտյան Ադրբեջան» թեմայով գործունեությունը
Բաքվում այսօր տեղի է ունեցել «Վերադարձ Արևմտյան Ադրբեջան» թեմայով հանրային քննարկում, որը կազմակերպել էր «ՀԿ-ներին պետական աջակցության գործակալություն»-ը․ գրում են ադրբեջանական լրատվամիջոցները։
«Նույնիսկ հետպատերազմական շրջանում մենք տեսնում ենք, որ Հայաստանի և հայկական սփյուռքի որոշ ուժեր շարունակում են Ադրբեջանի պատմությունը կեղծելու փորձերը։ Այս երեսպաշտությունը պահանջում է, որ մենք ավելի զգոն լինենք։ Ադրբեջանական ՀԿ-ները պետք է ավելի ակտիվացնեն իրենց գործունեությունն Արևմտյան Ադրբեջանի թեմայով։ Ադրբեջանցիների խաղաղ վերադարձը ներկայիս Հայաստան մարդու հիմնարար իրավունքների հարց է», – ասել է քննարկման մասնակից Ֆուադ Մամեդովը։
«ՀԿ-ներին պետական աջակցության գործակալության» գործադիր տնօրեն Այգյուն Ալիևան էլ հայտնել է, որ «Արևմտյան Ադրբեջանի» վերաբերյալ նախագծերի թիվը 2022 թվականի 24-ից աճել է մինչև 51՝ 2025 թվականին, և այս հարցը կմնա առաջնահերթություն 2026 թվականի համար։
Մասնակիցները ներկայացրել են նաև «Արևմտյան Ադրբեջանին» նվիրված քարտեզներ, գրքեր, վավերագրական ֆիլմեր և նախագծեր։
Իրանագետ Վարդան Ոսկանյանն իր ֆեյսբուքյան էջում գրել էր, որ Բաքվի բռնապետն իր վերջին ելույթներով հանձնարարական է տալիս արհեստածին Ադրբեջանի պետական կառույցներին, հասարակական կազմակերպություններին և, այսպես կոչված, գիտնականներին ծավալել «իրենց պատմական հողեր՝ այժմյան Հայաստան, ադրբեջանցիների վերադարձն» ապահովող գործունեություն։
