Մարսի վրա կայծակ է որոտացել

Մարսի վրա կայծակ է որոտացել․ գրում է The New York Times-ը։

Երևույթը նկատած գիտնականները նշում են, սակայն, որ այն Երկրի վրա տեղի ունեցող ուժեղ կայծակից տարբերվում է․ այն ավելի շատ նման է այն ցնցմանը, որը մարդը զգում է, երբ ցուրտ ձմռանը՝ առավոտյան, ոտքերը քսում է գորգին, ապա դիպչում դռան մետաղական բռնակին։

«Դա նման է մինի-կայծակի», – ասել է Ֆրանսիայի Թուլուզ քաղաքի Աստղաֆիզիկայի և մոլորակագիտության հետազոտական ​​ինստիտուտի գիտնական Բապտիստ Շիդը։

Նշվում է, որ «Կարմիր մոլորակ» ուղևորվել պատրաստվող տիեզերագնացների համար աննշան ցնցումներն էլեկտրահարման վտանգ չեն ներկայացնի։

«Իհարկե, դա ձեզ չի սպանի», – ասել է Շիդը։

Նշվում է, սակայն, որ ժամանակի ընթացքում էլեկտրական ցնցումները կարող են վնասել էլեկտրոնային սարքերը, այդ թվում՝ տիեզերական կոստյումները: Ուստի՝ ստացված նոր գիտելիքները հնարավորություն կտան ինժեներներին նախագծել տիեզերանավեր և սարքավորումներ՝ հաշվի առնելով նաև այս երևույթը և դրա հնարավոր հետևանքերը։