Մոսկվան Զելենսկու 20 կետերը համարում է բանակցությունների մեկնարկային կետ․ Bloomberg

Այսօր առավոտյան Ուկրաինայի նախագահի ներկայացրած 20 կետանոց խաղաղության ծրագրի վերաբերյալ Ռուսաստանի պաշտոնական պատասխանի բացակայության պայմաններում Bloomberg-ը մեկնաբանություն է խնդրել Կրեմլին մոտ անանուն աղբյուրից։

Աղբյուրը նշել է, որ Մոսկվան Ուկրաինայի և Միացյալ Նահանգների  քննարկումներից ծնված ծրագիրը համարում է հետագա բանակցությունների մեկնարկային կետ, քանի որ այն չունի Ռուսաստանի համար կարևոր դրույթներ և բազմաթիվ հարցերի պատասխաններ:

Ռուսաստանը փաստաթուղթը համարում է «բավականին տիպիկ ուկրաինական ծրագիր», բայց այն կուսումնասիրի «սառը գլխով»,- հավելել է աղբյուրը:

Աղբյուրի խոսքով՝ Ռուսաստանը դժգոհ է ՆԱՏՕ-ի հետագա արևելյան ընդլայնման և Ուկրաինայի չեզոք կարգավիճակի երաշխիքների բացակայությունից, եթե այն միանա Եվրամիությանը: Ծրագիրը նաև չի ներառում Ուկրաինայի հետպատերազմյան զինված ուժերի հարցում Ռուսաստանի պահանջած սահմանափակումները, ինչպես նաև ռուսերենի կարգավիճակի հստակ երաշխիքներ: Ռուսաստանը նաև ցանկանում է «պարզաբանում պատժամիջոցների վերացման և Արևմուտքում սառեցված հարյուր միլիարդավոր դոլարների ռուսական պետական ​​ակտիվների վերաբերյալ», հաղորդում է Bloomberg-ը։