Լուսնային թռիչք կատարելուց հետո Artemis II-ի անձնակազմը վերադառնում է Երկիր

ՆԱՍԱ-ի Artemis II առաքելության չորս տիեզերագնացները հաջողությամբ ավարտել են Լուսնի շուրջ թռիչքը և այժմ վերադառնում են Երկիր․ գրում է Euronews-ը։

Վայրէջք չնախատեսող այս թռիչքի ընթացքում առաքելությունը հասել է տիեզերքի այնպիսի խորքեր, որտեղ երբևէ որևէ մարդ չի եղել։

Հյուսթոնում տեղակայված ՆԱՍԱ-ի առաքելության կառավարման կենտրոնը մոտ 40 րոպեով կորցրել էր կապն առաքելության անձնակազմի հետ, երբ նրանց տիեզերանավն անցնում էր Լուսնի հակառակ կողմով։ Կապի ժամանակավոր խզումը սպասելի էր, քանի որ Artemis II-ն անցել էր Լուսնի հակառակ կողմը և այդ ընթացքում տեսանելի չէր Երկրից։

«Հրաշալի է կրկին կապ հաստատել Երկրի հետ։ Մենք միշտ կընտրենք Երկիրը․ մենք միշտ կընտրենք միմյանց», – ասել է տիեզերագնաց Քրիստինա Քոչը, երբ անձնակազմի անդամները կրկին կապ են հաստատել առաքելության կառավարման կենտրոնի հետ։

ԱՄՆ նախագահ Դոնալդ Թրամփը զանգահարել և շնորհավորել է տիեզերագնացներին «պատմություն կերտելու» համար՝ ասելով, որ նրանք «իսկապես, աներևակայելի հպարտություն են պատճառել ամբողջ Ամերիկային»։