Լոս Անջելեսում կայացել է «Էմմի» 76-րդ մրցանակաբաշխությունը։ Նոմինանտների թվում են եղել սերիալներ, հեռուստաֆիլմեր և հեռուստաշոուներ, որոնք հեռարձակվել են 2023 թվականի հունիսի 1-ից մինչև 2024 թվականի մայիսի 31-ը։
«Շոգուն» պատմական սերիալը, որը պայքարում էր 25 արձանիկների համար, հաղթել է հիմնական անվանակարգերում և ճանաչվել «Լավագույն դրամատիկ սերիալ»։ Գլխավոր դերը կատարել է ճապոնացի դերասան Հիրոյուկի Սանադան, ով ստացել է «Էմմի» մրցանակը՝ «Դրամատիկական սերիալի լավագույն դերասան» անվանակարգում։ «Լավագույն դերասանուհի դրամատիկ սերիալում» անվանակարգում հաղթող է ճանաչվել Աննա Սավայը։ Նախագիծը դարձել է մասնակի ճապոներեն նկարահանված առաջին բազմասերիանոց ֆիլմը, որն առաջադրվել է «Էմմի» մրցանակին, իսկ դերասաններն առաջին ճապոնացի դերասանները, որոնք հաղթել են այս անվանակարգերում։
Ջերեմի Ալեն Ուայթն արժանացել է կատակերգական սերիալի լավագույն դերասան անվանակարգին՝ «Արջը» ֆիլմում խոհարարական հանճար Կարմեն Բերզատոյի դերի համար։ «Արջը» ռեկորդ է սահմանել «Էմմի» մրցանակաբաշխության կատակերգական նախագծի համար՝ ներառվելով ամենաշատ անվանակարգերում՝ 23: Նախագծի երկրպագուները, այդուհանդերձ, բազմիցս նշել են, որ շոուի սյուժեն իրականում հեռու է կատակերգական ժանրից և դրանում ծիծաղելի քիչ բան կա։
Կատակերգական սերիալի լավագույն դերասանուհի տիտղոսը շնորհվել է Ջին Սմարթին՝ «Հնարքներ» (Hacks) սերիալում Դեբորա Վենսի դերի համար:
