Հրազենային վնասվածքից զոհված Աղասի Դալլաքյանը Բասեն համայնքից էր, տան ավագ որդին

Այսօր հրազենային վնասվածքից զոհված Աղասի Դալլաքյանը 2023 թվականին էր զորակոչվել բանակ: Նա Շիրակի մարզի Բասեն համայնքից էր: ABC Media-ի հետ զրույցում Բասեն վարչական շրջանի ղեկավար Հայկ Մնացյանն ասաց, որ զինծառայողը խելոք, հարգանքով երիտասարդ էր, տան ավագ որդին:

«Հայրն արտագնա աշխատող է, Աղասին իրենից փոքր մեկ եղբայր ունի, դպրոցական է` 6-րդ կամ 7-րդ դասարան:

Սովորական ընտանիք էին, տանը բնակվում էին հայրը մայրը, եղբայրը, տատիկն ու պապիկը: Իրենց ընտանիքը գյուղում շատ հարգված, հավասարակշռված ընտանիք է»,-ասաց Բասեն վարչական շրջանի ղեկավար:

Խոսելով զինծառայողի մահվան շրջանառվող վարկածի` ինքնասպանության մասին, Հայկ Մնացյանը նշեց` չէր կարող պատկերացնել, որ կդիմի այդպիսի քայլի:

«Որպես գյուղի երեխա ինքը շատ հարգանքով մեծի հետ, շնորհքը տեղը, աշխատասեր երիտասարդ էր: Նախքան բանակ զորակոչվելը գյուղատնտեսությամբ էր զբաղվում, օգնում էր ընտանիքին, նույնիսկ թրթուրավոր տեխնիկա էր աշխատացնում, վար էր անում»,- ասաց Բասեն վարչական շրջանի ղեկավարը:

Հայկ Մնացյանի խոսքով` ինքն արդեն այցելել է ընտանիքին, բարեկամներն իրավիճակը սկզբում թեևացնելու համար, ասել են, որ տղան դեռ վիրավոր է, հայրն էլ այս պահին երկրում չէ:

Ավելի վաղ հայտնել էինք, որ հոկտեմբերի 13-ին՝ ժամը 09:30-ի սահմաններում, հայտնաբերվել է ՊՆ N զորամասի զինծառայող Աղասի Սերոժի Դալլաքյանի դին՝ հրազենային վնասվածքով: Դեպքի հանգամանքներն ամբողջովին պարզելու նպատակով ընթանում է քննություն:

Նշենք, որ այս ամսվա ընթացքում սա ոչ մարտական պայմաններում զինծառայողի մահվան երկրորդ դեպքն է։