Վրաստանի որոշ ընտրատեղամասերում ձայների վերահաշվարկ կիրականացվի

Վրաստանի Կենտրոնական ընտրական հանձնաժողովը որոշ ընտրատեղամասերում կվերստուգի խորհրդարանական ընտրությունների արդյունքները։

Վարչական շրջանների ընտրական հանձնաժողովներում ընդգրկված պաշտոնյաները հաշվելու են քվեաթերթիկները յուրաքանչյուր շրջանի հինգ տեղամասերում: Տեղերը որոշվել են պատահականության սկզբունքով` վիճակահանությամբ: Մարզերում ձայների հաշվարկը կսկսվի այսօր՝ ժամը 12։00-ին, իսկ Թբիլիսիում՝ 17։00-ին։ Քվեաթերթիկների հաշվարկը վերահսկելու են համապատասխան մարմինները։

Հիշեցնենք, որ իշխող «Վրացական երազանք» կուսակցությունը հավաքել է ձայների 53,93 տոկոսը։ Այս արդյունքները չեն ճանաչել խորհրդարան անցած բոլոր չորս ընդդիմադիր ուժերը, նրանց աջակցող հասարակական կազմակերպությունները և Վրաստանի նախագահը: