Վրաստանը` հետխորհրդային երկրներից մեկը, որը հայտնվել է Արևմուտքի և Ռուսաստանի միջև, բռնապետության և Մոսկվային ենթարկվելու արագընթաց ուղու վրա է, գրում է The Telegraph-ը:
Ինչպես նշվել է, Պուտինի հանդեպ բարյացակամ վերաբերմունք ունեցող «Վրացական երազանք» կուսակցությունը «հաղթել է» այս շաբաթավերջին կայացած խորհրդարանական ընտրություններում՝ հավաքելով ժողովրդական քվեների 53,93 տոկոսը:
«Թրանսփարենսի Ինթերնեշնլ Վրաստան» միջազգային կազմակերպությունը պատրաստել է ավելի քան 360 լուսանկար և տեսագրություն, որոնք փաստում են ընտրախախտումները։
«Եթե Արևմուտքը միասնական դիրքորոշում չընդունի «Վրացական երազանք»-ի կողմից մարդու իրավունքների ոտնահարման դեմ, Վրաստանը վտանգում է ավելի արագ հայտնվել Ռուսաստանի ճիրաններում: Իր ուղեծրում ունենալով Բելառուսը և Վրաստանը, քաջալերված Մոսկվան կուժեղացնի Մոլդովայում հակաժողովրդավարական դերակատարներին և կկիրառի հարկադրանք՝ Հայաստանին ահաբեկելու համար: Արևմուտքը պետք է կարմիր գիծ սահմանի «Վրացական երազանք»-ի կողմից իշխանության չարաշահման և Ռուսաստանի կողմից վրացական ժողովրդավարության տապալման դեմ ոչ միայն հանուն Վրաստանի, այլև՝ եվրոպական անվտանգության շահերի», – գրում է պարբերականը:
