Մինչ աշխարհը պայքարում է հանածո վառելիքի դեմ Բաքվում, Ալիևն այն անվանում է «Աստծո պարգև»

Համաշխարհային առաջնորդները հավաքվում են ՄԱԿ-ի կլիմայական ամենամյա համաժողովում, որը տեղի է ունենում Բաքվում, սակայն հնչեղ անուններն ու հզոր երկրները նկատելիորեն բացակայում են՝ ի տարբերություն կլիմայի վերաբերյալ անցյալ բանակցությունների, գրել է Washington Times-ը։ Ինչպես նշվել է, 2024-ի COP29-ի կլիմայական բանակցություններն ավելի շատ նման են Շախմատի միջազգային ֆեդերացիայի աշխարհի առաջնությանը, որտեղ բացակայում են ճանաչելի անունները: Ածխածնի երկօքսիդն աղտոտող 13 խոշորագույն երկրների բարձրագույն ղեկավարները չեն հայտնվի։ Նրանց ազգերը պատասխանատու են 2023 թվականին արտանետված գազերի ավելի քան 70%-ի համար: «Այն մարդիկ, ովքեր պատասխանատու են դրա համար, բացակայում են»,- գագաթնաժողովում իր ելույթի ժամանակ հայտարարել է Բելառուսի նախագահ Ալեքսանդր Լուկաշենկոն։

Ադրբեջանի նախագահ Իլհամ Ալիևն, իր հերթին, իր ելույթը սկսել է քննադատելով Հայաստանին, արևմտյան լրատվականներին, կլիմայի ակտիվիստներին և քննադատներին, ովքեր ընդգծել են նրա երկրի նավթի և գազի հարուստ պատմությունն ու առևտուրը՝ դրանք անվանելով կեղծ։ Ալիևը հայտարարել է, որ նավթն ու գազը «Աստծո պարգևն են», ինչպես արևը, քամին և հանքանյութերը: «Չպետք է մեղադրել երկրներին դրանց առկայության համար։ Եվ չպետք է մեղադրել այդ ռեսուրսները շուկա բերելու համար, քանի որ շուկան դրա կարիքն ունի»։ Ալիևի հայտարարություններին ի պատասխան՝ Ֆլետչեր Հարփերը՝ GreenFaith-ից, իր հայտարարության մեջ կոչ է արել կրոնին հղում կատարելիս հանածո վառելիքներն անվանել «բառացիորեն դժոխք տանող մայրուղի միլիարդավոր մարդկանց և մոլորակի համար»։