Ալիևը ռուսական ընկերություններին հրավիրել է Արցախ
Ադրբեջանի նախագահ Իլհամ Ալիևը РИА Новости–ի հետ զրույցում հայտարարել է, որ Ադրբեջանում ռազմաբազա ստեղծելու Թուրքիայի մտացածին պլանների մասին ԶԼՄ–ների հաղորդումները քաղաքական շահարկումներ են։
Հարցազրույցը վարել է Russia Today միջազգային մեդիա խմբի գլխավոր տնօրեն Դմիտրի Կիսելևը։ Նախագահը տեղեկատվական կեղծիք է անվանել Ադրբեջանում թուրքական ռազմաբազա տեղակայելու ծրագրերի մասին տեղեկությունները, քանի որ այսօր գրեթե անհնար է մեկ ռազմաբազա թաքցնել աշխարհի որևէ կետում։
«Սա և՛ Ադրբեջանի, և՛ Թուրքիայի պարտավորությունն է օգնության հասնել, եթե այս կամ այն երկիրը բախվի արտաքին սպառնալիքի, արտաքին ագրեսիայի»,- պարզաբանել է նախագահը։
Ալիևը նշել է, որ երկրների միջև ավելի քան 30 տարվա ռազմական համագործակցության ընթացքում Թուրքիան և նրա ռազմական կառույցները մեծ դեր են խաղացել ադրբեջանական բանակի արդիականացման և մարտունակության, գործողությունների պլանավորման, իրավիճակի վերլուծության և «ռազմական հետախուզության բարձր չափանիշներին հասցնելու գործում»: Նա ընդգծել է, որ Բաքուն Անկարայի շնորհիվ հասել է «ռազմական գործողությունների արդյունավետության բարձր աստիճանի»։
«Մենք շատ երախտապարտ ենք մեր թուրք ընկերներին նման օգնության համար»,- նշել է Ալիևը։
Նա նաև հայտարարել է, որ Բաքուն սպասում է ռուսական ներդրումներին «Ղարաբաղի վերականգնման համար և ուրախ կլինի տեսնել ռուսական ընկերություններին այնտեղ»:
