Թրամփն հանձնարարել է հեռախոսազրույց կազմակերպել Պուտինի հետ երդմնակալությունից հետո․ CNN
ԱՄՆ նոր նախագահ Դոնալդ Թրամփը ծրագրում է մոտ օրերս զանգահարել իր ռուս գործընկեր Վլադիմիր Պուտինին․ հայտնում է CNN-ը՝ հղում անելով աղբյուրներին։ Ամերիկացի առաջնորդն արդեն համապատասխան հանձնարարականներ է տվել իր օգնականներին։
Թրամփի ներկայացուցիչները շաբաթներ առաջ սկսել են աշխատել այդ հարցի շուրջ։ Զրույցի ստույգ ամսաթիվը դեռ պարզված չէ։ Լրատվամիջոցները, սակայն, գրում են, որ խոսակցությունը պետք է կայանա Հանրապետականի երդմնակալությունից հետո, որը տեղի կունենա այսօր։
Կողմերը նախատեսում են քննարկել Ուկրաինայում ստեղծված իրավիճակը։ Թրամփը և նրա թիմը հույս ունեն արագ սկսել աշխատել հակամարտության խաղաղ կարգավորման ծրագրի վրա։ Նա հույս ունի համաձայնության գալ իր աշխատանքի առաջին ամիսների ընթացքում, ավելացնում են հոդվածի հեղինակները։
