Նրանք, ովքեր պնդում են թե ԵՄ-ը և ԵԱՏՄ-ն համատեղելի են, մոլորեցնում են հայ ժողովրդին․ Օվերչուկ
Երևանը գիտի, որ Հայաստանի անդամակցությունը Եվրամիությանը կհանգեցնի նրա՝ Եվրասիական տնտեսական միությունից (ԵԱՏՄ) դուրս գալուն և այս երկրի համար ԵԱՏՄ շուկայի փակմանը. այս մասին լրագրողներին հայտնել է ՌԴ փոխվարչապետ Ալեքսեյ Օվերչուկը։
«Այստեղ լուծումը շատ ակնհայտ է. Եվրամիության հետ շուկաների բացումը կնշանակի շուկաների փակում Եվրասիական տնտեսական միության հետ: Հակառակ դեպքում՝ մեր արտադրողները կտուժեն Եվրասիական տնտեսական միությունում, դա ակնհայտ է»,- նշել է ՌԴ փոխվարչապետը։ Նա մանրամասնել է, որ Հայաստանի համար «ԵՄ-ի հետ ներմուծման մաքսային դրույքաչափերի զրոյացումը ինքնաբերաբար կնշանակի վերադարձ ԵԱՏՄ-ի հետ մաքսատան և մաքսային սակագներին»։
«Մեզ համար, իհարկե, սա ազդանշան է, որ Եվրամիությանն անդամակցելու սկիզբը ԵԱՏՄ-ից դուրս գալու սկիզբն է»,- նշել է Օվերչուկը։ Նա վստահ է, որ «դա բացարձակապես ակնհայտ է ցանկացած մարդու համար, ով թեկուզ մի փոքր ծանոթ է այս երկու ինտեգրացիոն ասոցիացիաների կառուցվածքին»։ Նրա խոսքով՝ հայկական կողմը միանգամայն հստակ գիտի հետևանքների մասին, և ոչ ոք չպետք է պատրանքներ ունենա»։
Օվերչուկը նշել է, որ «այն մարդիկ, ովքեր այժմ Հայաստանում ընթացող քննարկումների ընթացքում պնդում են, թե իբր հնարավոր կլինի ինչ-որ լուծում գտնել, մեղմ ասած, մոլորեցնում են հայ ժողովրդին»։ ՌԴ վարչապետը նշել է, որ ԵՄ-ին Հայաստանի անդամակցության գործընթացը երկար է լինելու և կոչ է արել սպասել այս հարցով Հայաստանի խորհրդարանում լսումների արդյունքներին։
Նա նաև հավելել է, որ Ղազախստանում կայանալիք Եվրասիական միջկառավարական խորհրդի նիստում Հայաստանի՝ Եվրամիությանն ինտեգրվելու ցանկության հարցը չի քննարկվի։
