Հայաստանը ցանկանում է սահմանազատում իրականացնել նաև հայ-վրացական սահմանին. Միրզոյան
Հայաստանի և Վրաստանի արտգործնախարարների համատեղ ասուլիսի ժամանակ, խոսելով տարածաշրջանի մասին, Միրզոյանն անդրադարձել է «Խաղաղության խաչմերուկ» ծրագրին և խոսել սահմանազատումից։
«Տեղյակ եք ՀՀ նախաձեռնությունից՝ «Խաղաղության խաչմերուկից», որը ենթադրում է ակտիվ տնտեսական, տրանսպորտային համագործակցություն: Նաև այս նախաձեռնության շրջանակներում Ադրբեջանին առաջարկել ենք ապաշրջափակել տրանսպորտային ենթակառուցվածքները: Պատրաստ ենք այս ծրագրով, բայց նաև մյուս ուղղություններով վերջնականացնել Ադրբեջանի հետ հարաբերությունների կարգավորման գործընթացը»,– ասել է Միրզոյանը։
Նա շեշտել է, որ ՀՀ–ն ոչ միայն հայ–ադրբեջանական, այլ նաև հայ–վրացական սահմանի սահմանազատում է ցանկանում իրականացնել։ Վրաստանի ԱԳ նախարար Մակա Բոճորիշվիլին իր հերթին հույս է հայտնել, որ ՀՀ–ի և Ադրբեջանի միջև Խաղաղության պայմանագիրը կամփոփվի այնպիսի դրույթներով, որ երկուստեք նպատակահարմար կլինեն։
