Դրամաշնորհներ Ուկրաինային, ճնշում Օրբանի վրա, նախագծեր Երևանում. Ինչո՞ւ է Թրամփն «ընկել» USAID-ի հետևից
ԱՄՆ կառավարությունում հերթական սկանդալն է հասունացել: ԱՄՆ Միջազգային զարգացման գործակալության (ԱՄՆ ՄԶԳ, USAID) գրասենյակը Վաշինգտոնում փակվել է։ Այն խուզարկվում և ստուգվում է․ գրել է ТАСС-ը։
Ինչպես նշվել է, աշխատակիցներն աշխատում են հեռակա կարգով, հայտնում են ամերիկյան լրատվամիջոցները։ Ըստ ԱՄՆ կառավարության արդյունավետության դեպարտամենտի (DOGE) ղեկավար Իլոն Մասկի, դրա հիմնական պատճառներն են եղել չվերահսկվող ֆինանսական ծախսերը (կազմակերպության բյուջեն 2024 թվականին կազմել է 32 մլրդ դոլար) և «այս հանցավոր կազմակերպության անհամապատասխանությունը ամերիկյան արժեքներին»։ Ակնհայտ է նաև, որ հանրապետականները ցանկանում են ԱՄՆ ՄԶԳ-ն վերցնել Պետդեպարտամենտի լիակատար վերահսկողության տակ։
Գործակալությունը ստեղծվել է 1960-ականներին մի քանի փոքր կառույցներից՝ նպատակ ունենալով տնտեսական աջակցություն ցուցաբերել զարգացող երկրներին, նպաստել աղքատության կրճատմանը և ժողովրդավարության ամրապնդմանը։ «Սակայն գործնականում հայտարարված բոլոր նպատակներն իրենց բնույթով բավականին ապակայունացնող էին։ Դրանց թվում են 2020 թվականին Ուկրաինային տրվող 800 միլիոն դոլարի դրամաշնորհները և 2021 թվականին Ղազախստանում KazAID ծրագրի մեկնարկը՝ Կենտրոնական Ասիայում ԱՄՆ-ի շահերը խթանելու համար, 2022 թվականին Ուկրաինայի համար Starlink համակարգերի գնումը, 2023 թվականին ճնշումը Հունգարիայում Վիկտոր Օրբանի կառավարության վրա և 2024 թվականին Հայաստանում քաղաքական նախագծերի ֆինանսավորումը», – գրել է գործակալությունը։
Ինչպես նշվել է, USAID-ի փակումն ակնհայտորեն տեղավորվում է Միացյալ Նահանգների նախագահ Դոնալդ Թրամփի` ԱՄՆ ծախսերն օպտիմալացնելու և նրա հավատարիմ վարչակազմի դիրքերն ամրապնդելու գաղափարների վեկտորի մեջ և միանգամայն տրամաբանական և հետևողական քայլ է թվում: Սակայն Սենատի արտաքին հարաբերությունների հանձնաժողովի դեմոկրատներն արդեն պահանջել են պետքարտուղար Մարկո Ռուբիոյից բացատրել, թե ինչպե՞ս և ինչու՞ են DOGE-ի աշխատակիցները կարողացել հասանելիություն ստանալ գործակալության փաստաթղթերին: Բացի այդ՝ քանի որ Կոնգրեսը ստեղծել է ԱՄՆ ՄԶԳ որպես անկախ գործակալություն, դրա գործունեությանը ցանկացած միջամտություն պետք է պաշտոնապես համաձայնեցվի և հաստատվի:
