Ադրբեջանում 15 ամսվա ընթացքում 21-րդ լրագրողին է կալանավորել՝ ԶԼՄ-ների նկատմամբ բռնությունների սրման պայմաններում․ CPJ

Լրագրողների պաշտպանության կոմիտեն (CPJ) դատապարտել է ադրբեջանական Arqument.az անկախ լրատվական կայքի գլխավոր խմբագիր Շամշադ Աղայի ձերբակալությունը և կոչ է արել Ադրբեջանի իշխանություններին ազատ արձակել նրան և բանտարկված այլ լրագրողների։

«Շամշադ Աղայի ձերբակալությունն ընդգծում է ադրբեջանական իշխանությունների մռայլ մտադրությունը՝ լռեցնելու և էլ ավելի սահմանափակելու երկրի փոքր և պայքարի մեջ գտնվող անկախ լրատվամիջոցներին», – նշել է CPJ-ի Եվրոպայի և Կենտրոնական Ասիայի ծրագրերի համակարգող Գուլնոզա Սաիդը: Նրա խոսքով՝ «Ադրբեջանի կառավարությունը պետք է անհապաղ չեղյալ հայտարարի իր աննախադեպ մեդիա ճնշումը և ազատ արձակի Աղային և անարդարացիորեն բանտարկված մյուս լրագրողներին»։

Ադրբեջանի մայրաքաղաք Բաքվում ոստիկանությունը փետրվարի 4-ի գիշերը ձերբակալել է Աղային և խուզարկել նրա տունն՝ առգրավելով նրա համակարգիչը, հին բջջային հեռախոսը, եղբոր հեռախոսը և տվյալների պահպանման և համակարգչային այլ սարքավորումներ։

Աղայի փաստաբան Շահլա Հումբատովան լրատվամիջոցներին հայտնել է, որ Աղան ձերբակալվել է որպես կասկածյալ՝ Գերմանիայում հիմնված Meydan TV հեռուստաալիքի դեմ հարուցված քրեական գործի շրջանակներում, որի հետ Աղան նույնպես գործակցել է։ Դեկտեմբերին արժույթի մաքսանենգության մեղադրանքով ձերբակալվել են Meydan TV-ի վեց լրագրողներ։

Ձերբակալվածները 2023 թվականի վերջից ի վեր արևմտյան դոնորներից ֆինանսավորում ստանալու համար մեղադրվող առնվազն 19 լրագրողների և լրատվամիջոցների աշխատողների թվում են՝ Ադրբեջանի և Արևմուտքի միջև հարաբերությունների անկման պայմաններում: Մի քանի այլ լրագրողներ ազատազրկվել են առանձին մեղադրանքներով։

CPJ-ի տվյալները ցույց են տվել, որ Ադրբեջանը 2024 թվականին աշխարհի 10 երկրների թվում է , որտեղ ամենաշատն են ձերբակալվում լրագրողները: