Հնդկաստանն այս տարի ակնկալում է 200 միլիոն դոլարի հրթիռային գործարք կնքել Ֆիլիպինների հետ․ Reuters
Հնդկաստանն ակնկալում է 2025 թվականին Ֆիլիպիններին ավելի քան 200 միլիոն ԱՄՆ դոլար արժողությամբ կարճ հեռահարության հրթիռներ վաճառել. Reuters-ին հայտնել են հնդկական աղբյուրները։
Հնդկաստանի պաշտպանական հետազոտական մարմնի կողմից մշակված Akash հրթիռային համակարգը հետաքրքրություն է առաջացրել Ֆիլիպիններում։ Նրանք Նյու Դելիին հայտնել են, որ պատվեր կկատարեն ապրիլին սկսվող ֆինանսական տարում. նշել են երեք աղբյուր:
Բոլոր աղբյուրները խոսել են անանունության պայմանով, քանի որ հարցը զգայուն է։
Մինչև 25 կմ հեռահարությամբ «երկիր-երկինք» հրթիռային համակարգը Հայաստան է արտահանվել 2024 թվականին՝ 230 միլիոն դոլար արժողությամբ գործարքով. հայտնում են աղբյուրները՝ հավելելով, որ ակնկալվում ֆիլիպիններին վաճառքն ավելի մեծ կլինի, քան՝ հայերինը։
Այնուամենայնիվ, նրանք չեն բացահայտել հրթիռների և ուղեկցող համակարգերի, այդ թվում՝ ռադարների թիվը։
Հրթիռներ արտադրող հնդկական Bharat Dynamics-ը 2024 թվականին Մանիլայում Ասիական պաշտպանության և անվտանգության ցուցահանդեսի մասնակիցներից մեկն էր:
Ընկերությունը և Հնդկաստանի պաշտպանության նախարարությունն անմիջապես չեն արձագանքել մեկնաբանության հարցումներին:
Ֆիլիպինների պաշտպանության խոսնակ Արսենիո Անդոլոնգը հրաժարվել է մեկնաբանել որևէ գործարքի առանձնահատկությունները կամ գնումների պլանները, սակայն նշել, որ երկրի զինված ուժերին «պետք են այդ հնարավորությունները»:
Ակնկալվող գործարքը կհետևի Հնդկաստանի կողմից 2022 թվականին Ֆիլիպիններին միջին հեռահարության BrahMos գերձայնային թևավոր հրթիռի 375 միլիոն դոլարի վաճառքին:
Գնումը տեղի է ունենում այն ժամանակ, երբ Մանիլան զարգացնում է իր ռազմական հզորությունը, քանի որ լարվածությունը սրվում է Պեկինի հետ՝ կապված Հարավչինական ծովի բանուկ ջրուղու վրա համընկնող պահանջների հետ, որտեղ վերջին տարիներին բախվում են երկու երկրների շահերը։
Ֆիլիպինների զինված ուժերի ղեկավարը հայտարարել է, որ երկիրը ձգտում է գնել ավելի շատ ռազմական տեխնիկա՝ իր զինանոցը արդիականացնելու համար, ներառյալ լրացուցիչ BrahMos հրթիռներ Հնդկաստանից և առնվազն երկու սուզանավ:
Հնդկաստանը զենքի ամենամեծ ներկրողն է աշխարհում, բայց ուժեղացնում է ներքին արտադրությունը և պաշտպանական արտահանումները՝ հակազդելու Չինաստանի ռազմական ուժին և ազդեցությանն իր հարևան երկրների վրա, այն բանից հետո, երբ նրանց զորքերը բախվել են Հիմալայների սահմանին 2020 թվականին:
Հնդկաստանի պաշտպանական սարքավորումների, այդ թվում՝ զենքի և զինամթերքի արտահանումը 2020 թվականից ի վեր աճել է գրեթե 150 տոկոսով՝ հասնելով 2,4 միլիարդ ԱՄՆ դոլարի 2024 թվականի մարտին ավարտված ֆինանսական տարում:
Այնուամենայնիվ, նրա զենքի արտահանումն ավելի ցածր է, քան այնպիսի երկրների, ինչպիսիք են Ավստրալիան և Հարավային Կորեան, և շատ ավելի ցածր է Չինաստանից, որն աշխարհում զենք արտահանող չորրորդ երկիրն է։
