Ադրբեջանը ոչ մի ապացույց չի ներկայացրել Վարդանյանին վերագրվող մեղադրանքները հիմնավորելու համար. ռուս փաստաբան
Ադրբեջանը որևէ ապացույց չի ներկայացրել Արցախի նախկին պետնախարար Ռուբեն Վարդանյանին վերագրվող հանցագործությունների մեղադրանքները հիմնավորելու համար․ գրել է փաստաբան և բլոգեր Իլյա Ռեմեսլոն։
«Շարունակում եմ հետևել Ռուբեն Վարդանյանի «դատավարությանը», ով այժմ իրական վտանգի մեջ է: Դատելով նիստերի դահլիճից արված լուսանկարներից՝ սա չափազանցություն չէ»,- գրել է փաստաբանը՝ Telegram-ի իր ալիքում։
Փետրվարի 19-ին Բաքվի զինվորական դատարանում կայացած լսումների ժամանակ բարերարը բողոք է հայտնել «այն աբսուրդի թատրոնի դեմ, որն Ադրբեջանի ջանքերով վերածվել է դատավարության»։
Ըստ Վարդանյանի՝ ի դեմս իրեն՝ պաշտոնական Բաքուն դատում է Հայաստանի ողջ ժողովրդին, աշխարհի բոլոր հայերին։ Բաց դատավարության հասնելու և իր իրավունքների ոտնահարման դեմ բողոքելու համար բարերարը հացադուլ է հայտարարել, որը նա անցկացնում է մեկ շաբաթից ավելի։
«Ուտելուց հրաժարվելը կանխատեսելիորեն ազդել է ամբաստանյալի առողջության վրա: Վարդանյանն այժմ ունի արյան բարձր ճնշում։ Նա շտապ հոսպիտալացման կարիք ունի։ Բայց բարերարին հիվանդանոցի փոխարեն կրկին դատարան են բերել (հնարավո՞ր է նման վիճակում մարդուն դահլիճ բերել), և նիստն ընթացել է սովորականի պես։ Սակայն ավելի ցնցող են վերջին դատական նիստի լուսանկարները։ Խոսքն անգամ հացադուլի մասին չէ. ինչո՞ւ այս հյուծված տղամարդն այնպիսի տեսք ունի, ասես Բաքվի քննչական մեկուսարանում ենթարկվել է ծեծի և խոշտանգումների: Հիմա այս հարցերին ոչ ոք չի պատասխանի։ Առայժմ մի բան է ակնհայտ. Ադրբեջանը ոչ մի ապացույց չի ներկայացրել Վարդանյանին վերագրվող հանցագործությունների վերաբերյալ մեղադրանքները հիմնավորելու համար»,- գրել է Ռեմեսլոն:
Վարդանյանի գործը բաղկացած է 422 ադրբեջաներեն հատորից, թեև միայն վեց հատորն է ուղղակիորեն վերաբերում նրան. մնացածը մանրամասն նկարագրում է Լեռնային Ղարաբաղի պատմությունը՝ սկսած 1987թ.-ից (ապագա բարերարն այն ժամանակ 19 տարեկան էր, նա Մոսկվայի պետական համալսարանի ուսանող էր և ապրում էր Մոսկվայում):
