Ամոթալի դատավարություն․ Amnesty International-ը կոչ է արել Ադրբեջանին դադարեցնել խաղաղ ակտիվիստների նկատմամբ անողոք հալածանքները
Amnesty International-ի Արևելյան Եվրոպայի և Կենտրոնական Ասիայի տնօրեն Մարի Ստրութերսը, արձագանքելով ադրբեջանցի հայտնի քաղաքական ակտիվիստ Թոֆիգ Յագուբլուի դատավճռին, հայտարարել է․ «Թոֆիգ Յագուբլուի դատավճիռը ևս մեկ մռայլ հանգրվան է Ադրբեջանի շարունակական արշավում՝ լռեցնելու նրանց, ովքեր համարձակվում են քննադատել կառավարությանը: Նրա դատավարությունը քաղաքական դրդապատճառներով մեղադրանքներով ուղեկցվել է պատշաճ դատավարության վերաբերյալ մտահոգություններով»:
Մարի Ստրութերսը նշել է, որ սա առանձին դեպք չէ, այլ՝ Ադրբեջանում քաղաքական ընդդիմության, անկախ լրատվամիջոցների և քաղաքացիական հասարակության նկատմամբ համակարգված ճնշումների մի մաս: Երկրի իշխանությունները պետք է անհապաղ և անվերապահորեն ազատ արձակեն Թոֆիգ Յագուբլուին և դադարեցնեն խաղաղ ակտիվիստների նկատմամբ անողոք հալածանքները։ «Միջազգային հանրությունը, որը երկար ժամանակ հանդուրժում է Ադրբեջանի ճնշումները՝ հօգուտ աշխարհաքաղաքական և տնտեսական շահերի, պետք է ամուր և սկզբունքային դիրքորոշում ցուցաբերի մարդու իրավունքների այս խախտումների դեմ», – հավելել է Ստրութերսը։
Մարտի 10-ին Բաքվի ծանր հանցագործությունների դատարանը Ժողովրդավարական ուժերի ազգային խորհրդի և «Մուսավաթ» կուսակցության անդամ Թոֆիգ Յագուբլուին դատապարտել է ինը տարվա ազատազրկման «էական վնաս պատճառած խարդախության» և «փաստաթղթերի կեղծման» մեղադրանքներով։ Թոֆիգ Յագուբլուն ձերբակալվել է 2023 թվականի դեկտեմբերի 14-ին, և նրա դատավարությունը, որը սկսվել է 2024 թվականի հունիսի 14-ին, լայնորեն դատապարտվել է պատշաճ ընթացակարգի բացակայության համար։ Մեղադրող կողմը հիմնվել է բացառապես տուժողի ցուցմունքների վրա՝ անտեսելով պաշտպանության բոլոր փաստարկները՝ ներառյալ դատական գործընթացի խախտումների մասին պնդումները:
