Թուրքիայում ձերբակալվել է նախագահական ընտրություններում Էրդողանի գլխավոր մրցակիցը

Ստամբուլի գլխավոր դատախազությունը 105 պետական ծառայողների և քաղաքական ակտիվիստների ձերբակալելու որոշում է կայացրել: Նրանց թվում է Ստամբուլի քաղաքապետ Էքրեմ Իմամօղլուն․ հայտնում է NTV հեռուստաալիքը։

Ըստ տեղեկությունների՝ բերման է ենթարկվել նաև քաղաքական գործչի մամուլի քարտուղար Մուրադ Օնգյունը։ Նշվում է, որ իրավապահները խուզարկություն են սկսել պաշտոնյայի տանը:

Էքրեմ Իմամօղլուն հայտնի է իր ընդդիմադիր հայացքներով և համարվում է Թուրքիայի ներկայիս նախագահ Ռեջեփ Թայիփ Էրդողանի հիմնական մրցակիցը հնարավոր արտահերթ նախագահական ընտրություններում, որոնք կարող են կայանալ 2027 թվականին։

Վերջերս,  գլխավոր դատախազության պահանջով,  Ստամբուլի համալսարանը հետ է կանչել Իմամօղլուի դիպլոմը ։ Քաղաքապետը նախ սովորել է Հյուսիսային Կիպրոսի համալսարաններից մեկում, ապա տեղափոխվել Ստամբուլ, թեև այդ ժամանակ ուսումնական հաստատությունը պաշտոնապես ճանաչված չէր։ Թուրքիայում նախագահական ընտրություններին կարող են մասնակցել միայն բարձրագույն կրթություն ունեցող քաղաքացիները։