Ադրբեջանն ու Իսրայելն ամրապնդում են կապերը գազի հետախուզման ոլորտում
Բաքուն ընդլայնում է իր էներգետիկ ռազմավարությունը Կենտրոնական Ասիայի սահմաններից դուրս՝ ամրապնդելով իր ներկայությունը Իսրայելում․ գրել է Euronews-ը:
Ինչպես նշվել է, Ադրբեջանը պատրաստվում է մեծացնել իր ներգրավվածությունը Իսրայելի էներգետիկ ոլորտում՝ ադրբեջանցի պաշտոնյաների Երուսաղեմ կատարած այցից հետո:
Ադրբեջանի էկոնոմիկայի նախարար Միքայիլ Ջաբբարովի գլխավորած պատվիրակությունը վերջերս բանակցություններ է վարել Իսրայելում՝ վերջնական տեսքի բերելու գազի հետախուզման հիմնական գործարքը: Ադրբեջանի պետական նավթային ընկերությանն (SOCAR) Իսրայելը հետախուզման իրավունք է շնորհել 2023 թվականին: Այնուամենայնիվ, Իսրայելի ափերի մոտ բնական գազի հետախուզումը հետաձգվել է Գազայի պատերազմի պատճառով, որը սկսվել է 2023 թվականի հոկտեմբերին: Երկուշաբթի Իսրայելը հետախուզական արտոնագրեր է տրամադրել կոնսորցիումին, որը բաղկացած է ադրբեջանական SOCAR-ից, բրիտանական BP-ից և իսրայելական NewMed Energy-ից։
SOCAR-ը գազ կփնտրի Zone I-ում՝ 1700 քառակուսի կիլոմետր տարածքում Իսրայելի տնտեսական ջրերի հյուսիսում։ Սա կլինի SOCAR-ի առաջին հորատումն Ադրբեջանի սահմաններից դուրս։ Փոխըմբռնման հուշագիր է ստորագրվել նաև SOCAR-ի և իսրայելական Union Energy ընկերության միջև՝ Իսրայելի Բացառիկ տնտեսական գոտում համատեղ հետախուզական աշխատանքների վերաբերյալ։ Հունվարի 31-ին SOCAR-ը հայտարարել է, որ համաձայնագիր է ստորագրել Union Energy-ի հետ՝ Միջերկրական ծովի ամենամեծ ծովային գազի հանքավայրերից մեկի՝ Թամար նախագծի բաժնետոմսերի 10%-ը ձեռք բերելու վերաբերյալ: SOCAR-ը ներդրումներ է կատարում իսրայելական Թամար ծովային գազի հանքավայրում և այժմ ընդլայնում է իր ներգրավվածությունը նոր հետախուզական լիցենզիաներով:
