Հեշտ չի լինի կտրել այն լարը, որը դեռևս կապում է ՀՀ-ն ՌԴ-ին․ միջազգային մամուլ
Երևանը քայլ առ քայլ շարունակում է Եվրոպային մերձենալու իր ուղին՝ միաժամանակ հեռանալով Ռուսաստանից։ Հայաստանի խորհրդարանն ընդունել է օրինագիծ, որով կառավարությունը պարտավորվում է հնարավորինս շուտ սկսել ԵՄ անդամակցության շուրջ բանակցությունները։
Հաջորդ քայլն այժմ պետք է լինի համաժողովրդական հանրաքվեն, գրել է Eunews–ը։ Պնդելով, որ դա կամք է, որը կիսում է բնակչության մեծամասնությունը, ՀՀ վարչապետը երկար ժամանակ կրկնում է կովկասյան երկիրը եվրոպական ուղեծիր դուրս բերելու անհրաժեշտությունը՝ միաժամանակ անջատելով այն Մոսկվայից։ Ինչպես նկատել է կայքը, հեշտ չի լինի կտրել այն լարը, որը դեռևս կապում է ՀՀ–ն Դաշնության հետ՝ հատկապես տնտեսական և էներգետիկ առումով։ Կրեմլն արդեն սպառնացել է հետևանքներով, եթե Երևանի կառավարությունը գնա այդ ճանապարհով: Այնուամենայնիվ, ԵՄ–ին անդամակցությունը խորդուբորդ և դժվարին ուղի է, որը կարող է տարիներ տևել և չի երաշխավորում դրական արդյունք, ինչպես ցույց են տալիս Թուրքիայի և Վրաստանի փորձերը: Եվրախորհրդարանի երկու պատգամավորներ՝ լատվիացի սոցիալիստ Նիլս Ուշակովսը և սլովակ Միրիամ Լեքսմանը ողջունել են Երևանի խորհրդարանի քվեարկությունը. «Մենք ի գիտություն ենք ընդունում այս որոշումը և ողջունում ենք այն որպես մեր ընդհանուր արժեքներին և երկրի ժողովրդավարական ճանապարհին Հայաստանի հաստատակամ հավատարմության ևս մեկ հստակ արտահայտություն»,- նշվել է համատեղ հայտարարության մեջ։
Փաշինյանն արդեն ազդարարել է Բրյուսելի հետ որքան հնարավոր է շուտ երկխոսության գնալու պատրաստակամության մասին՝ թղթի վրա դնելու ճանապարհային քարտեզը, որը տանում է դեպի անդամակցություն կոնկրետ միջոցառումների միջոցով, ինչպիսին է վիզային ռեժիմի ազատականացումը։ Le Monde–ն, իր հերթին գրել է, որ Մոսկվան նախազգուշացրել է Հայաստանին՝ ԵՄ–ին անդամակցելու մղումը կարող է ունենալ խիստ տնտեսական հետևանքներ: Անցյալ շաբաթ Ռուսաստանի Անվտանգության խորհրդի քարտուղար Սերգեյ Շոյգուն կրկնել է այդ նախազգուշացումը՝ նշելով, որ Երևանը կարող է կորցնել Մոսկվայի հետ առանց մաքսատուրքերի առևտուրը և բախվել ռուսական բնական գազի գների հնարավոր բարձրացմանը՝ հավելելով, որ Ռուսաստանը կարող է նաև արտաքսել մեծ թվով հայ աշխատանքային միգրանտների: Երևանի և Մոսկվայի միջև կապերը կտրուկ անկում են ապրել 2023 թվականին Ադրբեջանի կայծակնային հարձակումից հետո: Հայաստանը մեղադրել է Ռուսաստանին, որի գրեթե 2000 զինվորականներ խաղաղպահ գործունեություն էին իրականացնում տարածաշրջանում, որ ոչինչ չի ձեռնարկել կանխելու մարտերը և հետագայում ավելի քան 100.000 հայերի փախուստը տարածաշրջանից:
