Միջին միջանցքը կարևոր նշանակություն ունի տարածաշրջանային կապի ապահովման համար․ Կալլաս

Ղազախստանի նախագահ Կասիմ–Ժոմարտ Տոկաևը և ԵՄ դիվանագիտության ղեկավար Կայա Կալլասը քննարկել են Ղազախստանի և Եվրամիության միջև համապարփակ համագործակցության հեռանկարները։ Կալլասը նշել է, որ Ղազախստանն առաջին երկիրն է տարածաշրջանում, որը ստորագրել է ընդլայնված գործընկերության և համագործակցության համաձայնագիր ԵՄ–ի հետ։

Նրա խոսքով՝ դա երկկողմ հարաբերությունների զարգացման բարձր մակարդակի հաստատումն է։ Կալլասը նաև հայտարարել է ԵՀ–ի և Ղազախստանի միջև վիզաների տրամադրման ընթացակարգի պարզեցման վերաբերյալ համաձայնագրի կնքման ընթացակարգի մեկնարկի մասին։

Տոկաևի խոսքով՝ Ղազախստանը դրական է ընկալում այս լուրը, քանի որ այս քայլը լայն հնարավորություններ է բացում եվրոպական երկրների հետ միջանձնային կապերի և գործարար կապերի ամրապնդման համար։ Առանձնահատուկ ուշադրություն է դարձվել առևտրատնտեսական գործընկերության ընդլայնմանն այնպիսի առաջնահերթ ոլորտներում, ինչպիսիք են էներգետիկան, արդյունաբերությունը, թվայնացումը, ինչպես նաև Տրանսկասպյան տրանսպորտային միջանցքի զարգացմանն ուղղված խոշոր ենթակառուցվածքային նախագծերի իրականացումը։ Կայա Կալլասը նշել է, որ անդրկասպյան միջազգային տրանսպորտային երթուղին (TCITR), որին ԵՄ–ն աջակցում է շուրջ 90 միլիոն եվրոյով, մեծ նշանակություն ունի Կենտրոնական Ասիայում տարածաշրջանային կապի ապահովման համար:

Նրա խոսքով՝ այսօր Կենտրոնական Ասիան մեծ նշանակություն ունի ոչ միայն իր ռեսուրսների և տարածաշրջանային կայունության աշխարհագրական նշանակության, այլև՝ ներդրումային ներուժի առումով։ Բարձր ներկայացուցիչը նշել է, որ Ռուսաստանի և Ուկրաինայի միջև հակամարտությունը սկսելուց հետո նրանք պետք է փնտրեն այլընտրանքային, հուսալի և արդյունավետ առևտրային ու տրանսպորտային ուղիներ Եվրոպայի և Ասիայի միջև, որոնք չեն անցնի Ռուսաստանի տարածքով։ Հիշեցնենք, որ Միջին միջանցքը կապում է Չինաստանը, Ղազախստանը, Կասպից ծովը, Ադրբեջանը, Վրաստանը, Թուրքիան և Եվրոպան։ 2023 թվականի հոկտեմբերին Ադրբեջանը, Վրաստանը և Ղազախստանը համաձայնագիր են ստորագրել համատեղ երկաթուղային ընկերություն ստեղծելու մասին՝ Middle Corridor Multimodal Ltd.՝ տարանցիկ փոխադրումների արդյունավետությունը բարելավելու համար։