Ընտրություն կատարել եմ անցյալի հետ կռիվ չունեցող, ներկայում լուսավոր ապագա ստեղծող Գյումրիի համար․ Ռուբեն Մխիթարյան

Ընտրություն եմ կատարել հանուն հայկական, երիտասարդ, զարգացող, ավանդույթներով ու արժեքներով լի, դեպի առաջ ընթացող, անցյալի հետ կռիվ չունեցող, ներկայում իր լուսավոր ապագան ստեղծող Գյումրիի համար․ քաղաքապետի ընտրություններին քվեարկելուց հետո լրագրողների հետ զրույցում ասել է «Իմ հզոր համայնք» կուսակցության թեկնածու Ռուբեն Մխիթարյանը։

Լրագրողի հարցին, թե արդյոք տարածված լուրերը, որ Մարտուն Գրիգորյանը ընդդիմության միասնական թեկնածուն է, իսկ ինքը՝ Մխիթարյանը, շարժումը տանելու է դեպի Երևան, Մխիթայանը նշել է․ «Ես նման բան չեմ լսել։ Ընդդիմադիր ոչ մի թեկնածուի հետ ոչ մի տեսակի քննարկում իմ կողմից չի եղել»։

Լրագրողի հարցին՝ արդյոք այս ընտրությունները ուղղակի քաղաքային ընտրություննե՞ր են, թե՞ ՔՊ–ին տարբեր իշխանական օղակներից հեռացնելու միջոց, Մխիթարյանը նշել է, որ ընտրություններում հաղթանակը առաջին հերթին պետք է իշխող ուժին։

«Այս ընտրություններում հաղթանակի մասին երազում է հատկապես իշխող ուժը։ Մենք շատ լավ հասկանում ենք, որ մեր երկիրը հերթական օրհասական փուլում է գտնվում։ Իշխող ուժի ղեկավարը արդեն հայտարարել է, որ ինքը պատրաստ է ինչ–որ փաստաթղթերի տակ իր ստորագրությունը դնել։ Այդ մարդկանց այստեղ հաղթանակը պետք է, որպեսզի նրանք կարողանան թոզ փչել թե՛ սեփական երկրի ժողովրդի, թե՛ հանրության աչքերում, որ իրենք ունեն լեգիտիմություն մեր բոլորի փոխարեն ինչ–որ որոշումներ կայացնելու համար։ Ըստ այդմ՝ իմ խոսույթի մեջ եղել է թե՛ քաղաքային, թե՛ քաղաքական հռետորաբանություն», – ասել է Մխիթարյանը։