Ֆավորիտ համարում եմ հավաքական ընդդիմությանը․ Ռուբեն Մխիթարյան

Գյումրիի ընտրություններով մենք փորձում ենք լուծել Գյումրիի հարցը, Գյւոմրիի ընտրություններով մենք փորձում ենք լուծել ՀՀ ժողովրդին արթնացնելու, նոր իմպուլս տալու հարցը, Գյումրիի ընտրություններով մենք փորձում ենք լուծել մեր խարխլված արժանապատվության հարցը, Գյումրիի ընտրություններով մենք փորձում ենք լուծել մեր քաղաքը վերջնականապես վերականգնելու հարցը․ Գյումրիի քաղաքապետի ընտրություններին քվեարկելուց հետո լրագրողների հետ զրույցում ասել է «Իմ հզոր համայնք» կուսակցության թեկնածու Ռուբեն Մխիթարյանը։

Լրագրողի հարցին, թե ովքեր են ֆավորիտները, Մխիթարյանը նշել է, որ ֆավորիտ համարում է հավաքական ընդդիմությանը։

«Ֆավորիտ ես համարում եմ հավաքական ընդդիմությանը, կոնկրետ ոչ մեկի անունը չեմ տա։ Արդյունքները ցույց կտան։ Ունեմ ներքին համոզմունք, որ Գյումրին «Քաղաքացիական պայմանագիր» կուսակցությունը ներկայացնող քաղաքապետ չի ունենա», – նշել է Ռուբեն Մխիթարյանը։

Ընդդիմության հաղթանակի դեպքում, ընդդիմադիր թեկնածուների հնարավոր կալանավորումների սցենարը Մխիթարյանը չի բացառել։

Ռուսական 102-րդ ռազմաբազայի նշանակության մասին հարցին ի պատասխան՝ Մխիթարյանը նշել է․ «102-րդ ռազմաբազան Գյումրիում լուծում է երկու կարևոր խնդիր՝ անվտանգային և տնտեսական։ Քանի դեռ այդ խնդիրների լուծմանը փոխարինող բան տեղի չի ունեցել, 102-րդ ռազմաբազայից հրաժարվելը հիմարություն է»։