Քաղաքական երկրաշարժ. արևմտյան ԶԼՄ–ները` Մարին Լը Պենի դեմ դատական որոշման մասին

Արևմտյան լրատվամիջոցներն արձագանքել են ֆրանսիական աջակողմյան «Ազգային ճակատ» կուսակցության առաջնորդ Մարին Լը Պենի նկատմամբ կայացված դատավճռին։ Դատարանի որոշմամբ նա չի կարողանա մասնակցել Ֆրանսիայի հաջորդ նախագահական ընտրություններին։

Միևնույն ժամանակ, նա առաջատար դիրքեր է զբաղեցրել հարցումներում. նշում է Reuters-ը։ Գործակալությունը գրում է, որ Լը Պենի դատավճիռը կարող է լրջորեն փոխել քաղաքական լանդշաֆտը Ֆրանսիայում։ Ինչպես նշում է France 24-ը, Լը Պենին հինգ տարով առաջադրվելն արգելելու մասին դատարանի որոշումը «քաղաքական երկրաշարժ էր» երկրի համար՝ «շրջելով մրցավազքի ալիքը»։

Իր հերթին Politico-ն նշում է, որ Լը Պենն այժմ կանգնած է երկընտրանքի առաջ՝ «վրեժ լուծե՞լ, թե՞ օգնել իր կուսակցությանը»:

«Որոշումը կարող է լայնածավալ հետևանքներ ունենալ ֆրանսիական քաղաքականության վրա՝ արմատապես փոխելով նախագահ Էմանուել Մակրոնին հաջորդելու մրցավազքը և մեծացնելով ճնշումը նրա փոքրամասնության կառավարության վրա, որը թուլացել է ամիսներ շարունակվող ճգնաժամերի պատճառով», – ասված է Reuters–ի հրապարակման մեջ։

«Նա (Լը Պեն. –խմբ․) հեռացրեց ֆրանսիական ծայրահեղ աջ շարժման հին խորհրդանիշները, հարթեցրեց ամենակոպիտ եզրերը և դրա փոխարեն կառուցեց նրբագեղ և կարգապահ մեքենա՝ մեկ նպատակով՝ նախագահական աթոռը շահելու համար», – գրում է France 24–ը։

Հեռուստաալիքը ուշադրություն է հրավիրել այն փաստի վրա, որ Լը Պենի դատավճիռը դատապարտվել է Կրեմլում, Վաշինգտոնում, ինչպես նաև «ծայրահեղ աջ եվրոպացի քաղաքական գործիչների» կողմից, որոնց մեջ լրագրողները ներառել են նաև Հունգարիայի վարչապետ Վիկտոր Օրբանին։