Ռուսաստանն ու Իրանն ավելի սերտ գործընկերներ են դառնում․ The Jerusalem Post
Ռուսաստանի փոխարտգործնախարար Սերգեյ Ռյաբկովը քննադատել է Իրանին ռմբակոծելու ԱՄՆ-ի սպառնալիքները։ Նրա խոսքերն, ըստ երևույթին, իրանական հաղորդագրությունների մի մասն են՝ ԱՄՆ-ի ցանկացած գործողություն կանխելու համար։ Իրանը, կարծես, հույս ունի, որ Ռուսաստանը կարող է օգնել կանխել ԱՄՆ-ի հարվածները. գրել է The Jerusalem Post-ը։
Ինչպես նշվել է, Ռուսաստանն ու Իրանը գնալով ավելի սերտ գործընկերներ են դառնում։ Վերջերս Պեկինում բանակցություններ են վարել նաև Ռուսաստանը, Իրանը և Չինաստանը։
Ռուսաստանը չի ցանկանում թուլացած տեսնել իր իրանական դաշնակցին, ինչն ավելի ու ավելի է կարևորվում Մոսկվայի համար Սիրիայում Ասադի վարչակարգի տապալումից հետո: Ռուսաստանին անհրաժեշտ է իրանական գործընկերությունը տարբեր հարցերում, այդ թվում՝ ռազմածովային ոլորտում։ Երկու երկրները նաև ցանկանում են մեծացնել առևտուրը Կովկասով և հյուսիս-հարավ առևտրային միջանցքով, որը կանցնի Ադրբեջանով և, հնարավոր է, Հայաստանով:
Մոսկվան հայտարարել է, որ ԱՄՆ-ի ցանկացած հարված կարող է «աղետալի» հետևանքներ ունենալ տարածաշրջանի համար:
Ավելի վաղ Թրամփը հայտարարել էր, որ Իրանը պետք է բանակցությունների սեղանի շուրջ նստի առաջիկա մեկուկես ամսվա ընթացքում։ Թեհրանը մերժել է ԱՄՆ-ի հետ ուղիղ բանակցությունները։ Այն առաջարկել է անուղղակի բանակցություններ, հավանաբար Օմանում: «Եթե նրանք գործարքի չգնան, ապառմբակոծություններ կլինեն», – հայտարարել էր Թրամփը NBC News-ի հետ զրույցում։
Ռյաբկովի խոսքով՝ նման մեթոդներն անտեղի են։ Ռուսաստանում նաև հայտարարել են, որ կարող են օգնել ԱՄՆ-ի և Իրանի միջև միջնորդ դառնալու հարցում։ «Սա հետաքրքիր կլինի, եթե հաշվի առնենք, որ ԱՄՆ-ն նաև միջնորդ է Ռուսաստանի և Ուկրաինայի միջև: Այս բազմակողմ միջնորդությունը կարող է հանգեցնել մեծ գործարքի, որն իր մեջ ներառում է մի քանի խնդիրներ՝ ներառյալ Ուկրաինան և Իրանի միջուկային ծրագիրը: Սա, ամենայն հավանականությամբ, կընկալվի որպես Ռուսաստանի հաղթանակ, քանի որ դա Մոսկվայի համար ամուր դիրք կապահովի ինչպես Իրանի միջուկային խնդրի, այնպես էլ՝ ուկրաինական հրադադարի երաշխիքների հարցում», – նշվել է հոդվածում:
