Հնդկաստանը և Պակիստանը Քաշմիրում կրակել են միմյանց վրա
Հնդկաստանը մեղադրել է Պակիստանին՝ սահմանի մյուս կողմից ահաբեկչությունը խրախուսելու համար, այն ժամանակ, երբ զինված անձինք ապրիլի 22-ին Քաշմիրի Պահալգամի զբոսաշրջային գոտում սպանել են 26 խաղաղ բնակչի։ Սա համարվում է տարածաշրջանում վերջին 25 տարվա ընթացքում քաղաքացիական անձանց դեմ իրականացված ամենաողբերգական հարձակումը։
Իսլամաբադը կտրականապես հերքել է մեղադրանքները՝ դրանք անվանելով «անհիմն» և զգուշացնելով, որ կպատասխանի Հնդկաստանի ցանկացած գործողության։
Հնդկական անվտանգության ուժերը սկսել են լայնածավալ որոնողական գործողություններ՝ պատասխանատուներին հայտնաբերելու համար։
Հնդկաստանի զինված ուժերը կիրակի տեղեկացրել են, որ շփման գծի երկայնքով Պակիստանն իրականացրել է «սադրիչ» հրաձգություն, որին հնդկական ուժերը պատասխանել են համապատասխան փոքր զինատեսակներով կրակով։
Պակիստանի կողմը դեռևս չի արձագանքել կրակահերթի մասին հաղորդումներին։
Հնդկաստանի ոստիկանությունը հետախուզում է հայտարարել երեք կասկածյալի նկատմամբ՝ երկու պակիստանցու և մեկ հնդկացու, ովքեր, ըստ իրավապահների, կապ ունեն Պակիստանում գործող «Լաշքար-է-Տայբա» ահաբեկչական կազմակերպության հետ, որը ներառված է ՄԱԿ-ի ահաբեկչական խմբերի ցուցակում:
Հնդկաստանի ներքին գործերի նախարարությունը գործի հետաքննությունը փոխանցել է Ազգային հետաքննության գործակալությանը (NIA), որը մասնագիտացած է հակաահաբեկչական գործունեության մեջ։
Գործակալությունն այս փուլում հարցաքնում է միջադեպի ականատեսներին, ստուգում է մուտքի և ելքի կետերը և հավաքում է դատաբժշկական ապացույցներ՝ դեպքերի ամբողջական պատկերը վերականգնելու համար։
«Ականատեսների ցուցմունքները մանրամասնորեն ուսումնասիրվում են՝ լիարժեք պատկերացնելու Քաշմիրում տեղի ունեցած վերջին տասնամյակների ամենածանր ահաբեկչական հարձակման զարգացումները», — ասված է գործակալության հայտարարության մեջ:
