Իսպանիայի և Պորտուգալիայի մեծ մասում վերականգնվել է էլեկտրաէներգիայի մատակարարումը

Երկուշաբթի Պիրենեյան թերակղզում տեղի ունեցած լայնամասշտաբ հոսանքազրկումներից հետո Իսպանիայի և Պորտուգալիայի մեծ մասում վերականգնվել է էլեկտրաէներգիայի մատակարարումը․ գրում է The Guardian–ը։

Էլեկտրաէներգիան վերականգնվել է երեքշաբթի առավոտյան՝ մայրցամաքային Իսպանիայի գրեթե 90%-ում, հայտնել է REE էլեկտրացանցի օպերատորը: Պորտուգալիայի ազգային էլեկտրացանցի օպերատորի տվյալներով՝ գիշերը էլեկտրաէներգիան վերականգնվել է երկրի 6.5 միլիոն տներից մոտ 6.2 միլիոնում:

Պորտուգալիայի վարչապետ Լուիս Մոնտենեգրոն ասել է, որ խափանման աղբյուրը «հավանաբար Իսպանիայում է»։ Իսպանիայի վարչապետ Պեդրո Սանչեսն, իր հերթին, հայտարարել է, որ ուսումնասիրվում են բոլոր հնարավոր պատճառները։ Նա նաև զգուշացրել է հանրությանը ենթադրություններ չանել՝ «ապատեղեկատվության» ռիսկի պատճառով։

Հիշեցնենք, որ անջատումների հետևանքով երկուշաբթի չեղարկվել էին վիրահատություններ, հետաձգվել թռիչքներ, խափանվել էր տրանսպորտի աշխատանքը։

Հոսանքազրկումների որևէ հստակ պատճառ դեռևս հայտնի չէ։