Amnesty International միջազգային իրավապաշտպան կազմակերպությունը անցանկալի է հայտարարվել ՌԴ–ում
Ռուսաստանի գլխավոր դատախազությունը Ռուսաստանում անցանկալի է հայտարարել Amnesty International Limited միջազգային իրավապաշտպան կազմակերպությանը։
«Ռուսաստանի Դաշնության գլխավոր դատախազությունը որոշում է կայացրել Լոնդոնում գրանցված Amnesty International Limited միջազգային ոչ կառավարական կազմակերպության գործունեությունը Ռուսաստանի Դաշնության տարածքում անցանկալի ճանաչելու մասին», – հայտարարել է գլխավոր դատախազությունը։
Գերատեսչությունը նշել է, որ կազմակերպությունը «իրեն դիրքավորում է որպես աշխարհում մարդու իրավունքների պաշտպանության ակտիվ առաջնորդ», սակայն «իրականում AIL-ի լոնդոնյան գլխավոր գրասենյակը Կիևի ռեժիմի համախոհների կողմից ֆինանսավորվող գլոբալ ռուսաֆոբ նախագծերի նախապատրաստման կենտրոն է»։
«Հատուկ ռազմական գործունեության սկզբից ի վեր ակտիվիստներն անում են ամեն ինչ՝ տարածաշրջանում ռազմական բախումը սրելու համար: Նրանք արդարացնում են ուկրաինացի նեոնացիստների հանցագործությունները, կոչ են անում ավելացնել նրանց ֆինանսավորումը և պնդում են մեր երկրի քաղաքական և տնտեսական մեկուսացման վրա», – հավելել է գլխավոր դատախազությունը։
Գերատեսչությունը շեշտել է, որ կազմակերպության անդամները «աջակցում են ծայրահեղական կազմակերպություններին և ֆինանսավորում օտարերկրյա գործակալների գործունեությունը»։
