Ֆրանսիան ձգտում է խաղաղության Կովկասում՝ լարված հարաբերություներ ունենալով ՀՀ-ի հարևաների հետ․ RFi

Ֆրանսիան բարձրաձայնել է իր աջակցությունը Հայաստանի ինքնիշխանության և անվտանգության հարցում՝ դիրքորոշում, որը զայրացրել է թե՛ Բաքվին, թե՛ Մոսկվային․ գրել է  Radio France Internationale-ն։

Ինչպես նշվել է, վերջին տարիներին Փարիզն ամրապնդել է պաշտպանական համագործակցությունը Հայաստանի հետ՝ մատակարարելով այնպիսի սարքավորումներ, ինչպիսիք են CAESAR ինքնագնաց հաուբիցները։

«Այս ամենը միայն նպատակ ունի օգնել Հայաստանին ձեռք բերել իր բնակչությանը, տարածքային ամբողջականությունը և ինքնիշխանությունը պաշտպանելու միջոցներ», – նշել է Ֆրանսիայի արտաքին գործերի նախարար Ժան-Նոել Բարոն։

Ինչպես շեշտվել է, այս համերաշխության դրսևորումը, սակայն, աննկատ չի մնացել Ռուսաստանի կողմից։ Վերջերս Հայաստան կատարած այցի ժամանակ Ռուսաստանի արտաքին գործերի նախարար Սերգեյ Լավրովը մտահոգություն է հայտնել Երևանի՝ Ֆրանսիայի կողմը շրջվելու վերաբերյալ՝ կասկածի տակ դնելով դաշինքի դրդապատճառները։

Բարոն հակադարձել է՝ նշելով, որ Ֆրանսիան և Եվրոպան պատերազմի մեջ չեն Ռուսաստանի հետ, այլ դիմադրում են այն բանին, ինչը նա անվանել է «աշխարհի Պուտինացում»։

Նշվել է նաև, որ այս շաբաթ Ֆրանսիայի դիվանագիտական ջանքերը պտուղ  են տվել մեկ այլ ճակատում՝ փողոցային նկարիչ Թեո Կլերկի վերադարձով, ով ներում ստացավ և ազատ արձակվեց Ադրբեջանի կողմից՝ մետրոյի կայարանում իր նկարած գրաֆիտիի համար ավելի քան 400 օր ճաղերի հետևում անցկացնելուց հետո։

Ֆրանկո-ադրբեջանական հարաբերությունները լարված են եղել Ֆրանսիայի կողմից Հայաստանին ցուցաբերած աջակցության, Ադրբեջանի մարդու իրավունքների վիճակի քննադատության և այն մեղադրանքների պատճառով, որ Բաքուն կազմակերպել է ֆրանսիական հաստատությունները թիրախավորող ապատեղեկատվական արշավ։

Այնուամենայնիվ, սա Փարիզի համար միայն դիվանագիտական հաղթանակներ չէին։ Նույն օրը, երբ Բարոն կանգնած էր հայ ղեկավարների հետ Երևանում, Թեհրանը խիստ քննադատություն է հնչեցրել Ֆրանսիայի կողմից Միջազգային դատարանում երկու ֆրանսիացի քաղաքացիների՝ Սեսիլ Կոլլերի և Ժակ Պարիի՝ լրտեսության մեղադրանքով կալանավորման վերաբերյալ ներկայացված դատական գործընթացի վերաբերյալ։

Իրանական իշխանությունները գործը որակել են «անիմաստ» և մեղադրել Ֆրանսիային իրավական հաստատությունները «շահագործելու» մեջ։

Զույգը, որը ձերբակալվել է 2022 թվականին Իրանում անցկացրած արձակուրդի ժամանակ, մոտ 20 եվրոպացիների թվում է, որոնք ձերբակալվել են Թեհրանի կողմից ազդեցության լծակների կիրառման ռազմավարության շրջանակներում։ Ֆրանսիան պնդում է, որ զույգը պահվել է խոշտանգումների համարժեք պայմաններում և մեղադրում է Իրանին միջազգային պարտավորությունները խախտելու մեջ։