ԱՄՆ պաշտոնյաները սկսել են հաճախ այցելել Հարավային Կովկաս՝ խաղաղությունն ու առևտուրը խթանելու համար․ Eurasianet
Միացյալ Նահանգները դիվանագիտական ջանք է գործադրում Կովկասում խաղաղությունն ու առևտուրը խթանելու համար: Սակայն ԱՄՆ բարձրաստիճան պաշտոնյաների բազմաթիվ այցելությունների հիմնական նպատակը, կարծես, Կենտրոնական Ասիայի հետ Միջին միջանցքի առևտրի աճի խթանումն է. գրել է Eurasianet-ը։
Ինչպես նկատել է պարբերականն, անցած շաբաթվա ընթացքում չորս բարձրաստիճան ամերիկացի դիվանագետներ այցելել են Ադրբեջան, Հայաստան կամ երկուսն էլ՝ տարբեր թեմաների շուրջ բանակցություններ վարելու համար, այդ թվում՝ խաղաղության համաձայնագրի կնքման դադարեցված ջանքերի, փոխկապակցվածության, կրոնական ազատության և միջուկային էներգիայի վերաբերյալ։
Ըստ Eurasianet՝ թերևս, տարածաշրջան այցելած ամենաակնառու ամերիկացին Մոնտանայից հանրապետական սենատոր և Սենատի արտաքին հարաբերությունների հանձնաժողովի անդամ Սթիվ Դեյնսն էր, ով հանդիպել է Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հետ՝ փոխանցելով Թրամփի վարչակազմի ուղերձը, որ երկու երկրները «պետք է խաղաղության համաձայնագիր ստորագրեն՝ տարածաշրջանում կայունություն և բարգավաճում բերելու համար»։ Բաքու կատարած նրա այցի մասին ադրբեջանական հաղորդագրությունների համաձայն՝ Դեյնսը, կարծես, մեկ այլ նպատակ ևս ուներ՝ խթանել ԱՄՆ-Ադրբեջան հարաբերությունների հալեցումը՝ Կենտրոնական Ասիայի հետ Միջին միջանցքի առևտրային երթուղու ընդլայնումն արագացնելու համար։
ԱՄՆ-Ադրբեջան հարաբերությունները վատթարացել էին Բայդենի վարչակազմի օրոք, ով քննադատել է Բաքվի կողմից քաղաքական և մամուլի ազատությունների լայնածավալ ճնշումները: Դեյնսը փոխանցել է նախագահ Թրամփի նամակը, որում, կարծես, նշվել է, որ այժմ Վաշինգտոնի գլխավոր մտահոգությունը առևտուրն է, այլ ոչ թե՝ իրավունքները։ Մինչ Դեյնսը ձգտում է վերականգնել հարաբերությունները Ադրբեջանի հետ, մայիսի 30-ին Վրաստան կատարած այցելությունը, կարծես, ամրապնդել է ԱՄՆ-ի կոշտ դիրքորոշումը Թբիլիսիում «Վրացական երազանքի» կառավարության նկատմամբ, որը վերջին 18 ամիսների ընթացքում երկիրը դուրս է մղել արևմտամետ ուղեծրից:
Թբիլիսիում Դեյնսը հանդիպել է հակակառավարական դիմադրության առաջնորդ Սալոմե Զուրաբիշվիլիի, ինչպես նաև այլ ընդդիմադիր քաղաքական գործիչների հետ: Վրաստանում ԱՄՆ դեսպանատան կողմից X-ում հրապարակված կարճ հայտարարության մեջ նշվել է, որ Դեյնսը նաև հանդիպել է կառավարության պաշտոնյաների հետ՝ «քննարկելու Վրաստանի ռազմավարական կարևորությունը Միացյալ Նահանգների համար, ընդդիմության առաջնորդների վերջերս տեղի ունեցած ձերբակալությունների վերաբերյալ մտահոգությունները և արևմտամետ Վրաստանի անհրաժեշտությունը՝ տարածաշրջանում բարգավաճում, առաջընթաց և կայունություն ապահովելու համար»։
