Դադա՞ր, թե՞ ձախողում. ինչու՞ Հայաստանը և Ադրբեջանը դեռևս խաղաղություն չեն կնքել․ Известия
Մարտի կեսերին Հայաստանը և Ադրբեջանը հայտարարել են, որ լիովին համաձայնության են եկել խաղաղության պայմանագրի տեքստի շուրջ, սակայն փաստաթուղթը դեռևս չի ստորագրվել՝ բանակցությունների ընթացքում առաջացած նախապայմանների պատճառով․ գրել է Известия-ն։
Ինչպես նշվել է, հունիսի սկզբին Հայաստանի վարչապետ Նիկոլ Փաշինյանը մեծ ուշադրություն է դարձրել մուսուլմանական Կուրբան Բայրամ տոնին։ Նախ՝ հեռախոսազրույցների ժամանակ նա անձամբ շնորհավորել է Իրանի և Թուրքիայի ղեկավարներին։ Երկրորդ՝ երկկողմ հարաբերությունների պատմության մեջ առաջին անգամ նա շնորհավորական ուղերձ է հղել Ադրբեջանի ժողովրդին։ «Մաղթում եմ խաղաղություն և բարգավաճում մեր երկրներին», – գրել է նա սոցիալական ցանցերում։
Շատերը Երևանում նշել են, որ շնորհավորանքները հնչել են հենց այն պահին, երբ Նիկոլ Փաշինյանը լայնածավալ արշավ է սկսել Հայ Առաքելական Եկեղեցու դեմ երկրի ներսում: Արդյունքում՝ Փաշինյանն անձամբ քննադատել է Գարեգին Բ կաթողիկոսին: Այնուհետև նա փաստացի սպառնացել է բռնի կերպով վտարել կրոնական առաջնորդին իր նստավայրից: Ընդդիմության շատ ներկայացուցիչներ նախկինում հայտարարել էին, որ Փաշինյանը գործում է՝ Բաքվի և Անկարայի շահերից ելնելով, և ներկայիս պայմաններում նրանք ավելի են համոզվել այս կարծիքում, իսկ մուսուլմանական տոնի նկատմամբ ուշադրությունը միայն վատթարացրել է իրավիճակը: Այս ֆոնին՝ ընդդիմությունը նույնիսկ սկսել է Փաշինյանին իմպիչմենտի ենթարկելու գործընթացը, չնայած հաջողության հավանականությունը շատ փոքր է:
Կայքը հիշեցրել է, որ Ադրբեջանի հետ համաձայնագրի տեքստը չի հրապարակվել, և դրա ճշգրիտ բովանդակությունը մնում է անհայտ: Միևնույն ժամանակ՝ Հայաստանը խոստովանում է, որ զիջումներ պետք է արվեին նաև այլ կետերի վերաբերյալ:
Արդյունքում՝ բոլոր հոդվածների շուրջ համաձայնեցնելուց հետո, կողմերը պետք է որոշեին փաստաթղթի ստորագրման վայրն ու ժամանակը: Սակայն դա դեռևս տեղի չի ունեցել: Ադրբեջանի ԱԳՆ-ն հայտարարել է, որ Բաքուն խաղաղության համաձայնագրից դուրս բազմաթիվ պահանջներ ունի իր հարևանների նկատմամբ։ Ադրբեջանցի պաշտոնյաները նաև պարբերաբար պահանջում են, որ իրենց հարևանները համաձայնվեն «Զանգեզուրի միջանցքի» ստեղծմանը՝ ճանապարհ, որը կկապի Բաքուն Նախիջևանի անկլավի և Թուրքիայի հետ։
Վերջապես, Բաքուն պարբերաբար հայտարարում է, որ Հայաստանը պետք է իր տարածքում տեղավորի մինչև 300 հազար ադրբեջանցի փախստականների։ Սկզբում այս թեման առաջացել էր որպես պատասխան Երևանի պահանջներին՝ հայերին Ղարաբաղ վերադարձնելու վերաբերյալ, բայց այժմ այն ստացել է իր սեփական կյանքը։
Հայաստանի իշխանությունները ընդգծել են, որ թույլ չեն տա «Զանգեզուրի միջանցքի» ստեղծումն իրենց տարածքում և կտրականապես դեմ են փախստականների տեղավորմանը։
