Ղարաբաղը հայ բնակչությունից մաքրելուց հետո Ադրբեջանը դադարել է հաշվի առնել Ռուսաստանի արձագանքը․ Զատուլին
Ադրբեջանը երբեք չի եղել Ռուսաստանի ռազմավարական գործընկերը. Lenta.ru–ի հետ զրույցում նշել է Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինը:
Պատգամավորը նշել է, որ Ադրբեջանը ո՛չ Եվրասիական տնտեսական միության, ո՛չ Հավաքական անվտանգության պայմանագրի անդամ չէ։ Հենց այդ կառույցների անդամների նկատմամբ է, որ օգտագործվում է «ռազմավարական գործընկեր» տերմինը: Միևնույն ժամանակ՝ նման անդամակցությունը չի պաշտպանում բացահայտ հակառուսական կուրսից: Բացի այդ՝ Զատուլինը նշել է, որ Ղարաբաղը հայ բնակչությունից մաքրելուց հետո Ադրբեջանը դադարել է հաշվի առնել Ռուսաստանի արձագանքը:
Նրա խոսքով՝ դրանից հետո Ադրբեջանի ղեկավարությունն այլևս որևէ պատճառ չուներ անհանգստանալու Ռուսաստանի հնարավոր բացասական արձագանքի մասին, զգուշանալու Ռուսաստանի միջամտությունից նման գործողություններին: Ռուսաստանի հետ հատուկ հարաբերությունները շեշտելու անհրաժեշտությունը դադարել է նշանակալի լինել։ Նախկինում հաղորդվել էր, որ Ադրբեջանի Մշակույթի նախարարությունը չեղարկել է Ռուսաստանի պետական և մասնավոր հաստատությունների կողմից անցկացվող բոլոր մշակութային միջոցառումները: Նման միջոցառումների պատճառը ռուս իրավապահ մարմինների աշխատակիցների կողմից Սվերդլովսկի մարզում բնակվող ադրբեջանցիների դեմ ձեռնարկված գործողություններն էին:
