Երևանը «խաղաղության», Փաշինյանը՝ իշխանության խաչմերուկում․ ԶԼՄ-ների ամփոփում
ՀՀ-ի ներկայիս իշխանությունները ՀԷՑ-ի ազգայնացմամբ լուծում են երկու խնդիր, Известия-ի հետ զրույցում նշել է Կովկասի հարցերով փորձագետ Արթուր Աթաևը։ «Նախ՝ նրանք ֆինանսական հոսքերը ուղղում են իրենց կողմը։ Երկրորդ՝ նրանք ամրապնդում են իրենց քաղաքական դիրքերը՝ չեզոքացնելով Սամվել Կարապետյանի ազդեցությունը, որին նրանք համարում էին իրենց հակառակորդ։ Ես չեմ կարծում, որ այս ամենն այս պահին լուրջ բողոքի ակցիաների պատճառ կդառնա։ Մենք տեսնում ենք, որ ընդդիմադիր շարժմանը պարզապես պակասում են մարդիկ, պակասում են փողոցային զանգվածները»,- կարծում է փորձագետը։
Свободная Пресса-ն գրել է, որ Հայաստանում տեղի ունեցած վերջին իրադարձությունները՝ հեղաշրջման փորձը, երկրի ամենահարուստ մարդկանցից մեկի՝ Սամվել Կարապետյանի ձերբակալությունն, աշխարհիկ և կրոնական իշխանությունների միջև հակամարտությունը մեծ հետաքրքրություն են առաջացրել Թուրքիայում։ Թուրք քաղաքագետ Քավիդ Վելիևը գրել է, որ Հայաստանի ներսում իրադարձությունները զարգանում են անբարենպաստ կերպով Փաշինյանի համար։
«Փաշինյանը նոր ընտրություններ է նշանակել 2026 թվականի հունիսին, որոնք պետք է վերականգնեն վստահությունը», – նշել է փորձագետը։ Այժմ՝ ընդդիմության և եկեղեցու հետ բախման մեջ, վարչապետը փորձում է աջակցություն գտնել տարբեր երկրների իշխանությունների կողմից։ «Փաշինյանը զարգացնում է ռազմական հարաբերություններ այնպիսի երկրների հետ, ինչպիսիք են Ֆրանսիան և Հնդկաստանը, քաղաքական հարաբերություններ Իրանի և Եվրոպայի հետ և ստորագրել է ռազմավարական համագործակցության համաձայնագիր Միացյալ Նահանգների հետ», – հիշեցրել է Վելիևը:
Փաշինյանի նոր գործընկերների որոնումները նրան հասցրել են Թուրքիա, ինչը մի քանի տարի առաջ անհնար էր պատկերացնել: Դա բացատրվում է նրանով, որ տարածաշրջանում կտրուկ աճել է «ադրբեջանա-թուրքական տանդեմի» աշխարհաքաղաքական ակտիվությունը: «Առողջ ժողովրդավարության մեջ ոչ ոք, լինի դա եկեղեցին, բանակը, թե քաղաքացիական հասարակությունը, անխոցելի է քննադատությունից։ Ընթացիկ ճգնաժամը Հայաստանի ժողովրդավարական հասունության փորձություն է: Եթե եկեղեցին և պետությունը շարունակեն իրենց կոնֆլիկտային վարքագիծը, ամենամեծ վնասը կհասցվի հենց հայկական ժողովրդավարությանը», – գրել է «Ագոս» հրատարակությունը:
