Գազայում մարդասիրական ճգնաժամ հրահրելու համար Իսրայելի դեմ ԵՄ պատժամիջոցներ դեռ չեն լինի. Politico

Եվրոպական Միության երկրները շարժվում են դեպի Իսրայելին պատժելու ծրագրի համաձայնեցում` Գազայում մարդասիրական ճգնաժամի համար, սակայն նախորդ օրը Բրյուսելում կայացած հանդիպման ժամանակ պատժամիջոցներ կիրառելու վերաբերյալ որոշում չի կայացվել. գրել է Politico-ն:

Եվրոպական հանձնաժողովն առաջարկել է մասամբ կասեցնել Իսրայելի ասոցացման համաձայնագիրը ԵՄ-ի հետ՝ սահմանափակելով երկրի մուտքը ստարտափների համար նախատեսված կարևոր հետազոտական և զարգացման ծրագրին։ Ծրագիրը ներկայացվել է ի պատասխան Հանձնաժողովի կողմից անցկացված վերանայման, որը պարզել է, որ Իսրայելը խախտում է համաձայնագրի պայմաններով ստանձնած իր մարդու իրավունքների պարտավորությունները։

Ըստ Politico-ի՝ երեք դիվանագիտական աղբյուրների՝ ԵՄ երկրների դեսպանները քննարկել են Հանձնաժողովի առաջարկը, սակայն մեծամասնությունը չի քվեարկել այն առաջ մղելու օգտին, քանի որ հարցը զգայուն է։ Դիվանագետները նշել են, որ Գերմանիայի աջակցությունը համարվում է կարևորագույն, և սակայն Գերմանիայի կանցլեր Ֆրիդրիխ Մերցը դեռևս չի աջակցել ԵՄ-ի կողմից պատժամիջոցի կիրառմանը։

«Հորիզոն» ծրագրի կասեցման առաջարկի վրա աշխատանքները կշարունակվեն, և Բրյուսելի պաշտոնյաները կփորձեն առաջիկա օրերին և շաբաթներին ավելի շատ աջակցություն ստանալ ծրագրի համար: Դիվանագետների խոսքով՝ կա հավանականություն, որ վերջնական որոշում կարող է կայացվել միայն ամառվանից հետո, քանի որ ԵՄ հաստատությունների և դեսպանատների աշխատակիցները օգոստոսին արձակուրդ են գնում: