Հարավային Կովկասը երբեք հեռու չէ լարվածությունից. Common Space
Հայ-իրանական սահմանին կրկին անորոշություն է, քանի որ շարունակվում է Հայաստանի և Ադրբեջանի միջև երկարատև հակամարտության հետագա աշխարհաքաղաքական մրցակցության վերածվելու ռիսկը։ Այն, ինչ մի ժամանակ պատերազմից հետո տարածքի և ինքնիշխանության շուրջ տեղայնացված անհամաձայնություն էր, այժմ խճճվել է տարածաշրջանային շահերի և ռազմավարական մանևրների ցանցում։ Ավելի ու ավելի շատ խաղաղությունը վտանգվում է ձևավորվել ոչ թե տեղի բնակչության կարիքներով, այլ՝ ավելի շատ հեռավոր մայրաքաղաքների հաշվարկներով. այս մասին գրել է Common Space-ը:
Նշվել է, որ եթե նպատակը խաղաղությունն է, ապա տարածաշրջանին անհրաժեշտ է ներառական, այլ ոչ թե՝ ընտրողական դիվանագիտություն և նոր աշխարհաքաղաքական խզումներ։
Իսրայելի կողմից իրականացված զանգվածային ռմբակոծություններից հետո, անցյալ ամիս Իրանի միջուկային օբյեկտների վրա ԱՄՆ-ի կողմից իրականացված օդային հարվածները հիշեցում էին, որ Հարավային Կովկասը երբեք հեռու չէ լարվածությունից։
Հոդվածում հիշատակվել է, որ չնայած կրոնական տարբերություններին, Հայաստանի և Իրանի միջև հարաբերությունները բարեկամական են։
Իրանը հստակ արտահայտել է իր դեմ դիրքորոշումը՝ զգուշացնելով Հայաստանի հետ իր սահմանին աշխարհաքաղաքական իրավիճակի ցանկացած փոփոխության դեմ:
Անվտանգության հետ կապված մտահոգությունները սրել է իսպանական հրատարակության կասկածելի հաղորդագրությունը, որտեղ նշվում էր, որ ԱՄՆ-ն մտադիր է օգտագործել Հայաստանի հարավային սահմանային գոտին Իրանի դեմ ռազմական և հետախուզական գործողությունների համար: Հայաստանի կառավարությունը կտրականապես մերժել է հաղորդագրությունը: Անկախ աղբյուրից՝ պատմությունն ընդգծեց, թե որքանով կարող է տարածաշրջանային անկայունությունը բորբոքվել նույնիսկ ամենակասկածելի ապատեղեկատվության, լուրերի և մանիպուլյացիայի փորձերից:
Ընդգծվել է, որ սրանք ոչնչով չեն նպաստում Հայաստանի և Ադրբեջանի միջև վստահության կառուցմանը։ Ավելին, դրանք բարդացնում են դեռևս անկայուն բանակցային գործընթացը։ ԱՄՆ ենթադրյալ ծրագրի շուրջ պարզության բացակայությունը, թե այն արդյոք երբևէ գոյությու՞ն է ունեցել կոնկրետ ձևով, միայն ընդգծում է իրավիճակի խոցելիությունը։ Հայաստանի և Ադրբեջանի ղեկավարների միջև Աբու Դաբիում վերջերս կայացած գագաթնաժողովում կողմերը հայտարարեցին, որ կստեղծեն նոր երկկողմ հանձնաժողովներ։ Տարածաշրջանային խորհրդակցությունները նույնպես անհրաժեշտ կլինեն, ոչ միայն այսօր, այլև՝ հատկապես ապագայում։
«Այս պահին տարածաշրջանին ամենաշատն անհրաժեշտ է ոչ թե ևս մեկ աշխարհաքաղաքական ռիսկ, նույնիսկ եթե միջազգային ֆինանսավորումը կարող է կարևոր լինել, այլ՝ պարզություն, վստահություն և կոնսենսուս», – նշվել է հոդվածում:
