Պուտինը և Թրամփը աջակցում են Ռուսաստանի և Ուկրաինայի պատվիրակությունների միջև ուղիղ բանակցությունների անցկացմանը
Ուկրաինայում հակամարտության դադարեցման մեկնարկային կետը Կիևի անվտանգության երաշխիքներն են. այս մասին հայտարարել է Ուկրաինայի նախագահ Վլադիմիր Զելենսկին՝ Սպիտակ տանը կայացած բանակցություններից հետո․ հաղորդում է բրիտանական Financial Times թերթը։ «Զելենսկին երկուշաբթի երեկոյան հայտարարության մեջ նշել է, որ անվտանգության երաշխիքները «հիմնական հարցն են, պատերազմի ավարտի մեկնարկային կետը», – հաղորդել է թերթը։
ՆԱՏՕ-ի գլխավոր քարտուղար Մարկ Ռյուտեն հայտարարել է, որ 30 երկրներից բաղկացած խումբը, այդ թվում՝ Ճապոնիան և Ավստրալիան, աշխատում է Ուկրաինայի համար անվտանգության երաշխիքների մշակման վրա՝ որպես հակամարտության կարգավորման մաս։ Օգոստոսի 18-ին Սպիտակ տանը տեղի է ունեցել ԱՄՆ նախագահ Դոնալդ Թրամփի և Ուկրաինայի նախագահ Զելենսկիի հանդիպումը։ Նրանցից բացի, բանակցություններին մասնակցել են նաև մի շարք եվրոպացի առաջնորդներ, ինչպես նաև Եվրահանձնաժողովի նախագահ Ուրսուլա ֆոն դեր Լեյենը և ՆԱՏՕ-ի գլխավոր քարտուղար Մարկ Ռյուտեն։
Թրամփը բանակցություններ է վարել Ռուսաստանի նախագահ Վլադիմիր Պուտինի հետ՝ Սպիտակ տան ղեկավարի և Վլադիմիր Զելենսկիի և եվրոպական առաջնորդների հետ հանդիպումից հետո։ Ռուսաստանի նախագահի օգնական Յուրի Ուշակովը հայտարարել է, որ Պուտինը և Թրամփը աջակցել են Ռուսաստանի և Ուկրաինայի պատվիրակությունների միջև ուղիղ բանակցությունների անցկացմանը։ ԱՄՆ նախագահը հայտարարել է, որ արդեն սկսել է նախապատրաստվել Պուտինի և Զելենսկիի հետ հանդիպմանը։ Թրամփի խոսքով՝ Ռուսաստանի և Ուկրաինայի առաջնորդների հետ իր հանդիպումը կկայանա նրանց երկկողմ բանակցություններից հետո։ Axios պորտալը պնդում է, որ Թրամփը հույս ունի Պուտինի և Զելենսկիի միջև հանդիպում անցկացնել մինչև օգոստոսի վերջը։
