Պուտինն ու Փեզեշքիանը քննարկել են Հարավային Կովկասում տիրող իրավիճակը

Ռուսաստանի նախագահ Վլադիմիր Պուտինն Իրանի նախագահ Մասուդ Փեզեշքիանին հեռախոսազրույցի ժամանակ տեղեկացրել է ԱՄՆ առաջնորդ Դոնալդ Թրամփի հետ Ալյասկայում կայացած գագաթնաժողովի արդյունքների մասին: Այս մասին հայտնել է Կրեմլի մամուլի ծառայությունը:

Ռուսաստանի և Իրանի նախագահները քննարկել են նաև Իրանի միջուկային ծրագրի շուրջ ստեղծված իրավիճակը և Հարավային Կովկասում տիրող իրավիճակը:

Կողմերն, ի թիվս այլ հարցերի, քննարկել են ռուս-իրանական համագործակցությունը էներգետիկայի և տրանսպորտի ոլորտներում: «Երկու նախագահները նաև «հաստատել են իրենց հանձնառությունը՝ տարբեր ոլորտներում ռուս-իրանական համագործակցությունը հետագայում ընդլայնելու հարցում»,-ասված է հաղորդագրության տեքստում։

Նշվել է նաև, որ Ռուսաստանի և Իրանի նախագահները «համաձայնվել են հանդիպել Շանհայի համագործակցության կազմակերպության առաջիկա գագաթնաժողովում՝ Չինաստանում»։ Այն նախատեսված է անցկացնել Տյանցզինում օգոստոսի 31-ից սեպտեմբերի 1-ը։

Ռուսաստանի նախագահի հետ զրույցում Իրանի առաջնորդը աջակցություն է հայտնել ուկրաինական ճգնաժամի լուծմանն ուղղված դիվանագիտական ջանքերին։