Վաշինգտոնի պայմանագիրը Հայաստանի համար երաշխիքներ չի տալիս, իսկ Նեթանյահուի հայտարարությունը Ցեղասպանության ճանաչում չէ. Հիլդա Չոբոյան

Օգոստոսի 8-ին Վաշինգտոնում ստորագրված փաստաթուղթը չի կարող դիտարկվել որպես Հայաստանի անվտանգության երաշխիք. ABC media-ի հետ զրույցում նշել է ֆրանսահայ հասարակական գործիչ Հիլդա Չոբոյանը։

Նրա խոսքով՝ համաձայնագրին կարելի է մոտենալ երկու տեսանկյունից՝ տեխնիկական և քաղաքական:

«Տեխնիկական առումով կարող ենք հուսալ, որ Միացյալ Նահանգների միջամտությունը որոշ երաշխիքներ կբերի Հայաստանին։ Բայց քաղաքական տեսանկյունից իրավիճակն ամենևին կայուն չէ։ Աշխարհաքաղաքական ֆոնը չափազանց անկայուն է, և այս լուծումը Հայաստանի համար որևէ հուսալի երաշխիք չի ապահովում»,- ասել է նա։

Չոբոյանը նշել է, որ ԱՄՆ-ի ներկայությունը Հարավային Կովկասում կարող է կարճաժամկետ ազդեցություն ունենալ, սակայն չի երաշխավորում խաղաղություն:

«Թրամփի դիրքորոշումները շատ մակերեսային եմ համարում։ Միացյալ Նահանգների միջամտությունը կարող է ստեղծել անկայունություն։ Նրանք հեշտությամբ կարող են հետ կանգնել իրենց ստորագրությունից։ Անցյալի փորձը ցույց է տալիս, որ ԱՄՆ միջամտությունները երբեք երկարատև խաղաղություն չեն բերել»,- ընդգծել է նա։

Նրա համոզմամբ՝ Վաշինգտոնի պայմանագիրը Հայաստանի համար լավագույն դեպքում կարող է պարզապես «հետաձգել» Ադրբեջանի հնարավոր հարձակումը:

«Հայաստանի շահը այս գործարքում առայժմ միայն որոշ ամիսների կամ տարիների հետաձգումն է։ Սա ավելի շատ ներքին քաղաքականության խնդիր է։ Իշխանությունը այս համաձայնագիրը կցուցադրի որպես հաղթանակ՝ ընտրություններում ձայներ ապահովելու համար», – նշել է Չոբոյանը։

Խոսելով ԱՄՆ-Ռուսաստան հնարավոր համաձայնության մասին՝ նա ընդգծել է․«Չեմ հավատում, որ Ռուսաստանը կկիսվի իր ազդեցությամբ այս տարածաշրջանում։ Այսօր կան որոշակի խոսակցություններ, դրանք միայն Ուկրաինայի պատերազմի հետ կապված մարտավարական պայմանավորվածություններ են։ Երկարաժամկետ հեռանկարում Ռուսաստանը չի ընդունի Միացյալ Նահանգների ներկայությունը Հարավային Կովկասում»:

Անդրադառնալով Նեթանյահուի հայտարարությանը, թե ճանաչում է Հայոց ցեղասպանությունը, Չոբոյանը նշել է. «Ամեն անգամ, երբ Իսրայելը խնդիր է ունենում Թուրքիայի հետ, սպառնում է ճանաչել Ցեղասպանությունը։ Այսօր էլ նույն իրավիճակն է։ Սա ոչ թե Կնեսետի ընդունած որոշում է, այլ Նեթանյահուի խոսք, որը որևէ արժեք չունի»,- նշեց նա։

Նրա խոսքով՝ նման հայտարարությունները ոչ միայն արժեք չունեն, այլև վնասում են Հայ Դատին․ «Ոչ մի արժեք չունի, երբ ցեղասպանությունը «ճանաչում» է մի ղեկավար, ով ինքն է նոր ցեղասպանություն իրականացնում։ Ցեղասպանության ճանաչումը պետք է լինի արդարությանն ուղղված քայլ, այլ ոչ թե քաղաքական հաշվեհարդար Իսրայելի և Թուրքիայի միջև», – եզրափակել է  Հիլդա Չոբոյանը։