Ուղիղ տեքստով ասում են՝ «Ալիևը կջղայնանա»․ Արթուր Վանեցյանի ճեպազրույցը՝ կետերով
«Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը Եռաբլուրում մասնակցել է «Արցախի կանչը» հուշարձանի բացմանը, որը բացվել է նրա ընտանիքի միջոցներով․ նպատակն այն է, որ անգամ հարազատների գերեզմանների զրկված արցախցիները այցելելու հուշարձան ունենան։
Վանեցյանի ճեպազրույցը կետերով ներկայացնում ենք ստորև․
- Քայլեր են ձեռնարկվում Արցախի էջը մշտապես փակելու ուղղությամբ, բայց ես վստահ եմ, որ այդ էջը փակել հնարավոր չէ։
- Այսօրվա միջոցառմանը իշխանությունը փորձել է խոչընդոտել, սկզբից բանավոր զգուշացրել են, որից հետո սպառնացել են ուժ կիրառել, հետո հասկացել են, որ դա սխալ կլինի իրենց կողմից, փոքր վատություն են արել՝ լույսերն անջատել են, որ բարձրախոս չտեղադրվի և մարդիկ իրենց սրտի խոսքը չասեն։ Ուղիղ տեքստով ասում են՝ «Ալիևը կջղայնանա»։
- Հուշարձանի ստեղծման պատճառն այն է, որ տեղահանված արցախցիները անգամ հարազատների գերեզմաններին այցելելուց են զրկված։ Մարդիկ գերեզման չունեն, զրկվել են տնից, տեղից, ընտանիքից, անգամ գերեզման չունեն։
- Նիկոլ Փաշինյանի գոյությունն է սպառնալիք Հայաստանի և Արցախի համար, Արցախի՝ այսօր չլինելը դրա ապացույցն է։ Ով կասի՝ խաղաղղությանը դեմ է՝ հոգեկան խանգարումներ ունեցող մարդ է։ Այլ հարց է՝ ինչ է առաջարկում այս իշխանությունը մեզ: Խաղաղության օրակարգն ինչի՞ հաշվին է կյանքի կոչվում։
- Ամբողջ ընդդիմության քայլերը մեկնաբանել չեմ կարող, այսօրվա հանրահավաքին անպայման մասնակցելու եմ։ Վերջին 5-6 տարում չի եղել հանրահավաք, որին չմասնակցեմ։
