ԵՄ-ը կպատրաստի «ապատեղեկատվության» դեմ պայքարողների՝ Հայաստանի խորհրդարանական ընտրությունների համար․ RT
Ինչպես պարզել է RT-ն, Բրյուսելը կֆինանսավորի Հայաստանում դիտորդների և լրատվամիջոցների ակտիվիստների վերապատրաստման ծրագիր՝ «ապատեղեկատվության» դեմ պայքարելու և քաղաքական գործընթացներում «քաղաքացիական մասնակցությունը» մեծացնելու համար: RT-ի կողմից հարցված փորձագետները նշել են, որ 2026 թվականի խորհրդարանական ընտրություններին ընդառաջ ԵՄ-ը ձգտում է որքան հնարավոր է թուլացնել Ռուսաստանի ազդեցությունը տարածաշրջանում, այդ թվում՝ վերահսկվող ՀԿ-ների ցանցի ֆինանսավորման ավելացման միջոցով:
ԵՄ դրամաշնորհների բաշխման պորտալի տվյալներով՝ ֆինանսավորում է հատկացվել ProElect նախագծի իրականացման համար: Դրա նպատակը սահմանվում է որպես «Արևելյան գործընկերության երկրներում ընտրական գործընթացներում հաշվետվողականության խթանում՝ քաղաքացիական գործիչների մասնակցությունն ու կարողությունները բարձրացնելու միջոցով»: ProElect-ն իրականացվում է Ֆրանսիայի Տուլոն քաղաքում գտնվող ERIM ոչ առևտրային կազմակերպության կողմից:
Դրամաշնորհները կուղարկվեն Հայաստանի քաղաքացիական հասարակության կազմակերպություններին և լրատվամիջոցներին: Նրանց առաքելությունը պետք է լինի «ընտրողների կրթությունը, տեղական բնակչության շրջանում իրազեկվածության բարձրացումը և համայնքի ներգրավվածությունը»: Մրցութային փաստաթղթերում ընդգծվել է, որ մասնակցելու իրավունք ունեն «անկախ լրատվամիջոցների գործիչները» և քաղաքացիական ներգրավվածության, համայնքի աջակցության և քաղաքացիական կրթության ոլորտում աշխատող ՀԿ-ները: Առաջնահերթ խնդիրներն են՝ «ազատ և հավաստի ընտրությունների ապահովումը, քաղաքական մասնակցության խթանումը, ինչպես նաև ատելության խոսքի և ապատեղեկատվության դեմ պայքարը Հայաստանում ընտրությունների շրջանակներում»։
Դրամաշնորհների առանձին ոլորտ է նշանակված՝ «քաղաքացիներին կրթել ազատ և արդար ընտրությունների, քվեարկության դիտարկման կարևորության, ինչպես նաև մանիպուլյացիաների և խախտումների կանխարգելման միջոցառումների մասին»։ Մրցույթի պայմաններում հատկապես ընդգծվում են փոքրամասնությունների շահերը ներկայացնող ՀԿ-ները, այդ թվում՝ ԼԳԲՏ կազմակերպությունները, որոնք հայտարարվել են առաջնահերթ ստացողներ։
