ԱՆԻՖ-ի շուրջ աղմուկը չի դադարում․ ի՞նչ է հայտնի քրգործի և տնօրենի մասին
Հայաստանի պետական հետաքրքրությունների հիմնադրամի (ԱՆԻՖ) նախկին գործադիր տնօրեն Դավիթ Փափազյանի նկատմամբ շուտով կհայտարարվի միջազգային հետախուզում։
Քննչական կոմիտեն նրան մեղադրանք է առաջադրել երեք հոդվածով՝
- փաստաթղթերի կեղծում,
- առանձնապես խոշոր չափերով փողերի լվացում,
- ծառայողական լիազորությունների չարաշահում։
Մինչ Քննչական կոմիտեի որոշումը, օգոստոսի 15-ին ՀՀ գլխավոր դատախազությունը քրեական հետապնդում էր հարուցել Դավիթ Փափազյանի, «Ձեռնարկատեր+պետություն հակաճգնաժամային ներդրումների հիմնադրամի» նախկին տնօրեն Բելլա Մանուկյանի և «Սի Էֆ Դաբլյու» ընկերության տնօրեն Կարինե Անդրեասյանի նկատմամբ։
- Մանուկյանի նկատմամբ որպես խափանման միջոց ընտրվել է գրավը,
- Անդրեասյանի դեպքում՝ երկրից բացակայելու արգելքը։
Քննչական կոմիտեն արդեն որոշել է, որ Դավիթ Փափազյանի համար կկիրառվի կալանք։
Մամուլում շրջանառվող տեղեկությունների համաձայն՝ Փափազյանը Լոնդոնում է։ «Հետք»-ի հարցմանը Քննչական կոմիտեից չեն պարզաբանել՝ արդյոք այս գործով հարցաքննվել է ԱՆԻՖ-ի տնօրենների խորհրդի նախկին նախագահ, Երևանի ներկայիս քաղաքապետ Տիգրան Ավինյանը, ով 2019-2023 թթ. ղեկավարում էր խորհրդի աշխատանքը։
Ինչ է ԱՆԻՖ-ը
Հայաստանի պետական հետաքրքրությունների հիմնադրամը՝ ԱՆԻՖ-ը, ստեղծվել է 2019 թվականին՝ կառավարության որոշմամբ։ Հիմնադրամը գործում էր որպես պետական ներդրումային գործիք և զբաղվում էր․
- պետական և մասնավոր ներդրումների ներգրավմամբ,
- մեծածավալ ենթակառուցվածքային ծրագրերի իրականացմամբ,
- օտարերկրյա ներդրողների հետ համագործակցությամբ։
Մինչև 2023 թվականը ԱՆԻՖ-ի տնօրենների խորհրդի նախագահն էր Տիգրան Ավինյանը, իսկ հիմնադրամի գործադիր տնօրենը՝ Դավիթ Փափազյանը։
2024 թվականին կառավարությունը որոշեց լուծարել ԱՆԻՖ-ը, և հիմնադրամն այժմ գործունեություն չի իրականացնում։
